जनकपुरधाम, ८ असोज । मधेश विश्वविद्यालयको चौथो विश्वविद्यालय सभा (सिनेट) बैठक बुधबार सम्पन्न भएको छ । बैठकको अध्यक्षता विश्वविद्यालयका कुलपति समेत रहेका मधेश प्रदेशका मुख्यमन्त्री सतिश कुमार सिंहले गरेका थिए ।

सभामा विश्वविद्यालयको शैक्षिक, प्रशासनिक र वित्तीय पक्षबारे विस्तृत छलफल गरिएको थियो । वार्षिक प्रतिवेदन प्रस्तुत गर्दै आगामी वर्षको बजेट योजना तथा नयाँ शैक्षिक कार्यक्रमहरूको खाका अनुमोदन गरिएको जानकारी दिइयो ।

कुलपति सिंहले विश्वविद्यालयलाई राष्ट्रिय तथा अन्तर्राष्ट्रिय स्तरमा प्रतिस्पर्धी बनाउन आवश्यक संरचनागत सुधार र शैक्षिक गुणस्तर वृद्धि प्राथमिकतामा रहने बताए । उनले भने, ‘मधेश विश्वविद्यालय केवल प्रदेशकै नभई मुलुककै शैक्षिक धरोहर हो । यसलाई उत्कृष्ट शिक्षण–अनुसन्धान केन्द्र बनाउन हामी प्रतिबद्ध छौं ।’

सभामा विज्ञान, प्राविधिक, कृषि, स्वास्थ्य र समाजशास्त्र क्षेत्रका नयाँ शैक्षिक कार्यक्रम सञ्चालन गर्ने तयारीबारे पनि जानकारी प्रस्तुत गरिएको थियो । साथै, प्रदेशको आवश्यकता अनुसार अनुसन्धानलाई प्राथमिकता दिने निर्णय समेत भएको छ । केही सदस्यहरूले स्थानीय समुदायसँग सम्बन्धित अनुसन्धान प्रवद्र्धन गर्नुपर्ने र शिक्षणसँगै सीपमूलक तालिम तथा उद्योग–व्यवसायसँग सहकार्य आवश्यक रहेको सुझाव दिएका थिए ।

बैठकले विश्वविद्यालयको स्थायी क्याम्पस विकास, भवन निर्माण र पूर्वाधार विस्तारसम्बन्धी योजनालाई अघि बढाउने निर्णय पनि गरेको छ । विद्यार्थीलाई सहज र पहुँचयोग्य शिक्षा प्रदान गर्न छात्रावास, पुस्तकालय र प्रयोगशालाको स्तरोन्नति आवश्यक रहेकोमा सभाले सहमति जनाएको छ ।

कुलपति सिंहले विश्वविद्यालय प्रशासनलाई वित्तीय पारदर्शिता र शैक्षिक सुशासन बलियो बनाउन निर्देशन दिँदै भने, ‘हामीले विश्वविद्यालयलाई राजनीति नभई शुद्ध शैक्षिक वातावरणमा विकास गर्नुपर्छ । यसमा सबैको साझा प्रतिबद्धता आवश्यक छ ।’