सिरहा, ७ भदौ । सिरहाको गोलबजार नगरपालिका–१३ भेल्हा डंगराहामा १५ वर्षीय बालक अभिषेक सिंहको अपहरणपछि हत्या गरिएको घटनामा संलग्न आशंकामा प्रहरीले आठ जनालाई नियन्त्रणमा लिएको छ ।

हत्या गरिएका अभिषेक सिंह स्थानीय संजय सिंहका छोरा हुन् । उनको शव मंगलबार बिहान गाउँ नजिकैको आँपको बगैंचामा फेला परेको जिल्ला प्रहरी कार्यालय सिरहाका सूचना अधिकारी प्रहरी निरीक्षक धर्मेशकुमार यादवले जानकारी दिएका छन् ।

उनका अनुसार अभिषेक आइतबार राति करिब ८ बजेदेखि बेपत्ता भएका थिए । परिवारजनले रातभरि खोजतलास गर्दा पनि कतै पत्ता लागेन । सोमबार बिहान करिब ८ बजे अभिषेकको मोबाइलबाट आमाको मोबाइलमा सन्देश आएको थियो । सन्देशमा अपहरण भएको उल्लेख गर्दै फिरौतीको माग गरिएको थियो । तत्कालै परिवारले प्रहरीमा जानकारी गराएको र अनुसन्धान अघि बढाइएको यादवले बताए ।

घटनास्थल गाउँको छेउमै भएको र शव समेत छिमेकमै फेला परेकोले प्रहरीले प्रारम्भिक अनुसन्धानको आधारमा अभिषेककै आफन्त वा छिमेकी संलग्न हुन सक्ने आशंका गरेको छ । यही आशंकाका आधारमा प्रहरीले अभिषेकका आफन्त र छरछिमेकसमेत गरी आठ जनालाई नियन्त्रणमा लिएर अनुसन्धान थालेको छ ।

‘अनुसन्धान प्रारम्भिक चरणमै छ, त्यसैले हाल पक्राउ परेकाहरूको नाम सार्वजनिक गरिएको छैन,’ प्रहरी निरीक्षक यादवले भने । यस घटनाले गाउँमा ठूलो सनसनी फैलिएको छ । स्थानीयबासी आक्रोशित देखिएका छन् भने मृतक अभिषेकका परिवार शोकमा छन् ।

प्रहरी स्रोतका अनुसार अपहरणपछि हत्या योजनाबद्ध ढंगले गरिएको हुनसक्ने देखिएको छ । शवको अवस्था र घटनास्थलको विवरण संकलन गर्दै थप अनुसन्धान जारी राखिएको छ ।

हत्या र अपहरणमा संलग्न दोषीमाथि कडा कारबाहीको माग गर्दै पीडित परिवारले न्यायको माग गरेका छन् ।

प्रहरीले घटनाको प्रकृति हेर्दा यो केवल आर्थिक फिरौतीकै लागि मात्र नभई अन्य व्यक्तिगत र पारिवारिक कारणले पनि प्रेरित हुनसक्ने भन्दै सबै कोणबाट अनुसन्धान गरिरहेको जनाएको छ ।