काठमाडौँ, ५ असोज । स्वास्थ्य मन्त्रालयकी कर्मचारी संगीता कौशल मिश्रलाई आइतबार राष्ट्रपति रामचन्द्र पौडेलले स्वास्थ्य तथा जनसंख्यामन्त्रीको जिम्मेवारी दिएका छन् ।

प्रधानमन्त्री सुशीला कार्कीले मिश्रलाई स्वास्थ्यमन्त्री बन्न सिफारिस गरेकी थिइन् । यस नियुक्तिसँगै मिश्राले स्वास्थ्य मन्त्रालयको नेतृत्व सम्हाल्दै स्वास्थ्य नीति, जनसंख्या कार्यक्रम र मन्त्रालयका सञ्चालनहरूमा आफ्नो भूमिका निर्वाह गर्नेछन् ।

मिश्राले यसअघि स्वास्थ्य मन्त्रालयमा अतिरिक्त सचिवको रूपमा कार्यरत रहँदा मन्त्रालयका विभिन्न कार्यक्रम र परियोजनामा अनुभव हासिल गरेकी थिइन् । तत्कालीन स्वास्थ्य मन्त्री प्रदीप पौडेलको नेतृत्वमा उनले स्वास्थ्य सचिवको प्रतिस्पर्धा समेत गरेकी थिइन् । तर, केपी शर्मा ओली नेतृत्वको मन्त्रिपरिषद्ले गरेको सचिव बढुवा निर्णयमा उनी परिनन् ।

मिश्रले त्यतिबेला आफ्नो मधेशी महिला पृष्ठभूमि र अन्य कारणका कारण सचिव पदमा बढुवा नपाइएको आरोप समेत लगाएकी थिइन् । उनी यस नियुक्तिसँगै स्वास्थ्य क्षेत्रमा सुधार, पहुँच विस्तार र महिला सशक्तिकरणका पहलमा विशेष ध्यान दिने विश्वास गरिएको छ ।