रौतहट, ५ असोज । इशनाथ नगरपालिका–८ मनसरी हुँदै भारततर्फ लैजाँदै गरेको अवस्थामा रौतहट प्रहरीले ठूलो मात्रामा लागूऔषध गाँजा बरामद गरेको छ ।

जिल्ला प्रहरी कार्यालय रौतहटको टोलीले प्रदेश ३–०१–०२२ च १८६१ नम्बरको तरकारी बोकेको पिकअप चेकजाँच गर्ने क्रममा ३३४ किलो गाँजासहित उक्त गाडी पक्राउ गरेको हो ।

प्रहरीका अनुसार पिकअप चालकलाई गाडी रोक्न आदेश गर्दा उनले तत्कालै फरार भएका थिए । तर, चेकजाँच गर्दा पिकअपको माथिबाट २० पोका काउली लोड गरिएको देखिए पनि तल २६ पोका गाँजा लुकाइएको अवस्थामा भेटिएको थियो । खुल्ला सिमाको मौकाको फाइदा उठाउँदै तस्करहरूले तरकारीमा गाँजा लुकाइ भारततर्फ लैजाँदै थिए ।

जिल्ला प्रहरी कार्यालय रौतहटका प्रवक्ता प्रहरी नायव उपरीक्षक राजु कार्कीले भने, ‘प्राप्त सूचनाको आधारमा प्रहरी टोलीले तस्करको योजना बिफल बनाएको हो । यस पटकको बरामद गाँजाको मात्रा ठूलो हुनु हाम्रो लागि पनि चुनौतीपूर्ण थियो ।’

नेपाल–भारत सीमावर्ती क्षेत्रमा लामो समयदेखि लागूऔषधको अवैध कारोबार हुने गरेकोले प्रहरीको निगरानी बढाइएको थियो । प्रहरीले सीमाक्षेत्रमा नियमित गस्ती, नाकाबन्दी र सूचना संकलनको माध्यमबाट ठूलो मात्रामा गाँजा बरामद गर्न सफल भएको जनाएको छ ।

डीएसपी कार्कीका अनुसार पक्राउ परेको गाडीमा लोड गरिएको गाँजा कसले ल्याएको र तस्करीमा संलग्न अन्य व्यक्तिहरूको खोजी गरिरहेको प्रहरीले जानकारी दिएको छ । ‘चालक फरार भए तापनि अनुसन्धान जारी छ । तस्करीमा संलग्न व्यक्तिहरूलाई छिट्टै पक्राउ गर्ने प्रयास भइरहेको छ,’ उनले भने ।