सिरहा, ४ असोज । लहान नगरपालिका–२३ गाढा गाउँमा सिँचाइका लागि प्रयोग गरिएको विद्युतीय मोटरबाट करेन्ट लाग्दा एक शिक्षकको मृत्यु भएको छ ।

शनिबार बिहान खेतमा रोपिएको धानमा सिँचाइ गर्ने क्रममा मोटर चलाउँदा जनता माध्यमिक विद्यालयमा कार्यरत ३८ वर्षीय वीजेन्द्रकुमार सहनी गम्भीर घाइते भएका थिए ।

घटनापछि आफन्त र स्थानीयको पहलमा उनलाई तत्काल उद्धार गरी लहानस्थित रामकुमार शारदा उमाप्रसाद मुरारका प्रादेशिक अस्पताल लगिएको थियो । तर, चिकित्सकले उनलाई अस्पतालमा पुग्नासाथ मृत घोषणा गरेको जिल्ला प्रहरी कार्यालयका प्रहरी निरीक्षक धर्मेशकुमार यादवले जानकारी दिए ।

स्थानीयले घटनाले गाउँमा शोक फैलिएको बताउँदै विद्युत् उपकरण प्रयोगमा सतर्क रहन चेतावनी दिएका छन् । प्रहरीका अनुसार मोटर र सिँचाइ उपकरण प्रयोग गर्दा सुरक्षा मापदण्ड अपनाउन सबैलाई आग्रह गरिएको छ ।