जनकपुरधाम, ३ असोज । जनकपुरधाम उपमहानगरपालिका–१९ वेङ्गाशिवपुरस्थित एमजी स्टील कारखानामा शुक्रबार दिउँसो लागेको भीषण आगलागीले करिब ४ करोड रुपैयाँ बराबरको क्षति भएको छ ।

व्यापारी कैलाश जैन र पारस जैनको लगानीमा सञ्चालित सो कारखानामा काठ तथा फलामका फर्निचर उत्पादनका लागि तयारी अवस्थामा रहेका सामान पूर्णरूपमा जलेर नष्ट भएको जनकपुरधाम उद्योग वाणिज्य सङ्घका पूर्व उपाध्यक्ष अम्भु साहले जानकारी दिए ।

साहका अनुसार दिउँसो कारखानामा वेल्डिङ्ग गर्ने क्रममा निस्किएको झिल्काले आगो फैलिएको अनुमान गरिएको छ । आगो लाग्नेबित्तिकै ठूलो धुवाँसहित कारखाना वरिपरि त्रास फैलिएको थियो ।

आगलागी नियन्त्रणका लागि धनुषा र महोत्तरीका विभिन्न स्थानीय तहबाट वारुणयन्त्र ल्याइएकामा ८ वटा वारुणयन्त्रको सहयोगमा नेपाल प्रहरी र स्थानीयवासीले संयुक्त रूपमा नियन्त्रणमा लिएका थिए । सो क्रममा वर्षा पनि सुरु भएकाले आगो निभाउन ठूलो मद्दत पुगेको थियो ।

घटनामा मानवीय क्षति नभए पनि भौतिक क्षति ठूलो भएकोले प्रभावित व्यवसायीहरू स्तब्ध बनेका छन् ।

यसअघि पनि जनकपुरधामका विभिन्न उद्योग तथा पसलहरूमा वेल्डिङ्ग वा विद्युतीय कारणले आगलागी हुने घटना दोहोरिरहेकाले व्यवसायी र सरोकारवाला निकायलाई सतर्क रहन प्रहरी प्रशासनले आग्रह गरेको छ ।