जनकपुरधाम, २५ भदौ । ‘जेनजी’ आन्दोलनका क्रममा शहादत प्राप्त गरेका विद्यार्थीप्रति श्रद्धाञ्जली अर्पण गर्दै जनकपुरधामभित्रका सम्पूर्ण विद्यालय तथा कलेजहरू अनिश्चितकालीन रूपमा बन्द गरिने भएका छन् ।

निजी विद्यालयहरुको छाता संगठन प्याब्सन जनकपुरधाम र नेशनल प्याब्सन जनकपुरधामले संयुक्तरूपमा जारी गरेको विज्ञप्तिमा हालको परिस्थिति र सुरक्षा संवेदनशीलतालाई ध्यानमा राख्दै अर्को सूचना नआएसम्मका लागि पठनपाठन बन्द गरिएको उल्लेख छ ।

विज्ञप्तिमा भनिएको छ, ‘आन्दोलनका क्रममा शहादत प्राप्त गरेका विद्यार्थीहरूप्रती हार्दिक श्रद्धाञ्जली प्रकट गर्दछौं । शोकाकुल परिवारप्रति गहिरो संवेदना व्यक्त गर्दै हालको असुरक्षित अवस्थालाई मध्यनजर गर्दै विद्यालय तथा कलेजहरूको पठनपाठन अर्को सूचना नआएसम्मका लागि स्थगित गरिएको जानकारी गराउन चाहन्छौं ।’

प्याब्सन जनकपुरधामका अध्यक्ष रवीन्द्र कुमार चौधरी र नेशनल प्याब्सन जनकपुरधामका अध्यक्ष दिपक कुमार ठाकुरले संयुक्तरूपमा हस्ताक्षर गरेको विज्ञप्ति बुधबार सार्वजनिक गरिएको हो ।

सडकमा भइरहेको प्रदर्शन, सुरक्षाकर्मी र आन्दोलनकारीबीच भइरहेका झडप तथा त्यसबाट उत्पन्न असुरक्षित वातावरणका कारण विद्यार्थी र अभिभावक त्रासमा रहेको विज्ञप्तिमा उल्लेख गरिएको छ ।

शैक्षिक संस्थाहरूले भने शान्ति, स्थायित्व र वार्तामार्फत समस्या समाधान गर्न सबै पक्षसँग अपिल गरेका छन् ।