जनकपुरधाम, १९ भदौ । लामो प्रतीक्षापछि राजश्री जनक विश्वविद्यालयको केन्द्रीय कार्यालय भवन निर्माण कार्य औपचारिक रूपमा सुरु भएको छ ।

गुठी संस्थानसँग भएको सम्झौताअनुसार नगराइन नगरपालिका–८ मनियारीमा जग्गा नापजाँच र छुट्याउने काम सुरु गरिएको छ । भवन निर्माण प्रारम्भसँगै विश्वविद्यालय स्थापनाको माग गर्दै आएका स्थानीयवासी उत्साहित भएका छन् ।

कार्यक्रम नेपाली कांग्रेसका युवा नेता प्रवेश चौधरीको संयोजनमा सम्पन्न भएको थियो । कार्यक्रममा मधेश प्रदेशका सांसद तथा पूर्वमन्त्री रामसरोज यादव, विश्वविद्यालय प्रशासन प्रमुख सन्तोष अर्याल, नगराइन नगरपालिका मेयर बिनय कुमार यादव, वडाध्यक्षहरू र स्थानीयवासीको उल्लेखनीय उपस्थिती थियो ।

सांसद यादवले कतिपयले विश्वविद्यालय राजधानीमै हुनुपर्ने तर्क गरेको भए पनि मनियारी क्षेत्र राजधानीकै केन्द्रमा पर्ने भएकाले अनावश्यक विवाद नगर्न सुझाव दिएका छन् । उनले भने, ‘शिक्षा जस्तो संवेदनशील क्षेत्रमा राजनीति गर्नु अनुचित हुन्छ । यो सम्पूर्ण प्रदेशको गौरवको विषय हो, त्यसैले सबै दल र समुदायले हातेमालो गरेर विश्वविद्यालय निर्माणलाई सफल बनाउनु पर्छ ।’

मेयर बिनय कुमार यादवले नगराइनवासीको तर्फबाट विश्वविद्यालयलाई आवश्यक सहयोग गर्ने प्रतिबद्धता व्यक्त गरे। विश्वविद्यालय प्रशासन प्रमुख सन्तोष अर्यालले भवन निर्माण कार्यलाई द्रुतगतिमा अघि बढाइने जानकारी दिए ।

स्थानीयवासीले भवन निर्माण प्रारम्भ हुँदा अब विश्वविद्यालय कागजमा मात्र नभई व्यवहारमा पनि देखिने भएकोमा खुशी व्यक्त गरेका छन् । भवन निर्माणले प्रदेशमा उच्च शिक्षाको पहुँच सहज बनाउन र शैक्षिक पूर्वाधारलाई मजबुत बनाउन महत्वपूर्ण योगदान पुर्याउने विश्वास सहभागीहरूले व्यक्त गरे ।