जनकपुरधाम, १८ भदौ । सरकारले प्रतिनिधिसभामा पेस गर्न लागेको विद्यालय शिक्षा विधेयकप्रति असन्तुष्टि जनाउँदै धनुषाका निजी विद्यालयहरूले बुधबार शान्तिपूर्ण विरोध प्रदर्शन गरेका छन् ।

प्याब्सन, एनप्याब्सन र हिसानको संयुक्त आयोजनामा भएको विरोध कार्यक्रममा विद्यालय सञ्चालकहरूले विधेयकमा समावेश प्रावधानलाई ‘निजी विद्यालयविरोधी’ भन्दै कडा आपत्ति जनाए ।

प्याब्सन धनुषाका अध्यक्ष नवल यादवले सरकारले ल्याउन लागेको विधेयक निजी विद्यालयप्रति बेइमानीपूर्ण रहेको टिप्पणी गरे । उनका अनुसार, ‘निजी विद्यालयहरू कम्पनी ऐनअन्तर्गत दर्ता भएका छन् । तर, विधेयकमा गैरनाफामूलक संस्था भनेर परिभाषित गरिएको छ । यो व्यवहारिक छैन । त्यसमाथि शत प्रतिशत छात्रवृत्ति दिने प्रावधान राखेर निजी विद्यालयलाई नै धराशायी बनाउन खोजिएको छ ।’

विरोधमा सहभागी विद्यालय सञ्चालकहरूले शिक्षा क्षेत्रमा निजी विद्यालयले पु¥याएको योगदानलाई सरकारले बेवास्ता गरेको आरोप लगाए । उनीहरूको भनाइमा सरकारले एकतर्फी ढंगले नीति बनाउन खोज्दा निजी विद्यालय मात्र नभई विद्यार्थी र अभिभावक दुवै प्रभावित हुने खतरा बढेको छ ।

विरोध कार्यक्रममा सहभागी वक्ताहरूले भने, ‘यदि सरकारले हाम्रो जायज माग सम्बोधन गरेन भने अझ कडाभन्दा कडा आन्दोलनमा उत्रिन बाध्य हुनेछौँ ।’

आन्दोलनकारीहरूका अनुसार निजी विद्यालयहरूको टुङ्गोविहीन भविष्यले हजारौँ विद्यार्थीको शिक्षा र अभिभावकहरूको विकल्प दुवै संकटमा पार्नेछ । उनीहरूले शिक्षा क्षेत्रमा सार्वजनिक–निजी साझेदारीको महत्त्वलाई सरकारले नबुझेको दाबीसमेत गरे ।

सरकारले ल्याउन लागेको विद्यालय शिक्षा विधेयक हाल प्रतिनिधिसभामा दर्ता गर्ने अन्तिम तयारीमा रहेको छ । तर, निजी विद्यालय संघसंस्थाहरूले भने संयुक्त आन्दोलनलाई अझ प्रभावकारी बनाउँदै लैजाने चेतावनी दिएका छन् ।