जनकपुरधाम, १८ भदौ । सार्वजनिक प्रशासनलाई सक्षम, सबल र जनमुखी बनाउन लोक सेवा आयोगले सञ्चालन गरिरहेको ‘विद्यार्थीमाझ लोक सेवा’ कार्यक्रम बुधबार जनकपुरधाममा सम्पन्न भएको छ ।

आयोगको हीरक जयन्ती (७५ वर्ष) अवसरमा वर्षभरि आयोजना हुँदै आएका विविध गतिविधिहरूमध्ये यो संवाद कार्यक्रममा मधेश प्रदेशका विभिन्न विश्वविद्यालयका विद्यार्थीहरू सहभागी भएका थिए ।

संवाद कार्यक्रममा आयोगका सदस्य माधव वेल्बासेले मेधावी जनशक्तिलाई सार्वजनिक सेवातर्फ आकर्षित गर्ने उद्देश्यले कार्यक्रम सञ्चालन गरिएको स्पष्ट पारे । ‘निजामतीसहितका सार्वजनिक क्षेत्रको सेवा प्रभावकारी बनाउन मेधावी जनशक्तिको आवश्यकता हुन्छ । त्यसैले हामीले सातै प्रदेशमा विद्यार्थीहरूसँग प्रत्यक्ष संवाद गर्दैछौँ,’ वेल्बासेले भने ।

कार्यक्रममा आयोगले सञ्चालन गर्दै आएका परीक्षा प्रणाली, योग्यता, निष्पक्षता र स्वच्छताको मूलभूत सिद्धान्तबारे विद्यार्थीलाई विस्तृत जानकारी दिइयो । हाल विश्वविद्यालय तथा शिक्षक सेवा प्रवेश परीक्षा बाहेकका सबै सरकारी सेवामा योग्यता आधारित परीक्षा सञ्चालन भइरहेको र त्यसकै आधारमा सिफारिस हुने व्यवस्था लागू भएको जानकारी पनि आयोगका पदाधिकारीहरूले दिए ।

जनकपुरधाम उपमहानगरपालिकाका प्रमुख मनोजकुमार साहले आयोगको परीक्षा प्रणाली अझै पनि निष्पक्ष रहेको बताए । उनले मधेश प्रदेशमा जनसंख्या धेरै भए पनि कर्मचारीको दरबन्दी अपुग भएकाले सेवाप्रवाहमा चुनौती आइरहेको उल्लेख गरे ।

मधेश प्रदेशका आठ जिल्लाका विभिन्न विश्वविद्यालयमा अध्ययनरत विद्यार्थीहरूले कार्यक्रममा लोक सेवा आयोगमार्फत हुने परीक्षा, योग्यता र अवसरबारे आफ्ना जिज्ञासा राखेका थिए । आयोगका पदाधिकारीहरूले विद्यार्थीका प्रश्नहरूको जवाफ दिँदै आयोगको भूमिकाबारे थप प्रष्ट पारे ।

आयोगले ‘विद्यार्थीमाझ लोक सेवा’ कार्यक्रम सातै प्रदेशको राजधानीमा सञ्चालन गर्ने तयारी गरेको छ । यसले युवालाई सरकारी सेवातर्फ आकर्षित गर्नुका साथै सार्वजनिक प्रशासनलाई पारदर्शी, सक्षम र जनमुखी बनाउन सहयोग पुग्ने आयोगको विश्वास छ ।