काठमाडौं, १५ भदौ । विद्यालय शिक्षा विधेयकमा आफ्ना माग समावेश गराउनुपर्ने मागसहित नेपाल शिक्षक महासंघले आइतबार पनि धर्ना कार्यक्रमलाई निरन्तरता दिएको छ ।

चौथो दिनसम्म पुगेको आन्दोलन अन्तर्गत महासंघ नेतृत्वको टोलीले यसपटक नेकपा एकीकृत समाजवादीको केन्द्रीय कार्यालय अगाडि धर्ना दिएका हुन् ।

यसअघि महासंघले नेपाली कांग्रेस, नेकपा एमाले र नेकपा माओवादी केन्द्रको केन्द्रीय कार्यालय अगाडि धर्ना दिइसकेको छ । तर, माग सम्बोधनमा प्रगति नभएको भन्दै शिक्षक महासंघले एकपछि अर्को दलको कार्यालय अगाडि दबाब कार्यक्रमलाई निरन्तरता दिइरहेको छ ।

महासंघका अध्यक्ष लक्ष्मीकिशोर सुवेदीले राजनीतिक दलहरूले शिक्षकका आवाजप्रति संवेदनशीलता नदेखाएको आरोप लगाउँदै दोस्रो चरणको आन्दोलनको तयारी भइरहेको चेतावनी दिए । उनले भने, ‘देशभरिका शिक्षक–कर्मचारी साथीहरू दोस्रो चरणको आन्दोलनका लागि तयार भइरहेका छन् । यदि हाम्रो माग सम्बोधन भएन भने यसपटकको आन्दोलन अघिल्ला वर्षको भन्दा पनि कडा हुनेछ ।’

महासंघले विद्यालय शिक्षा विधेयकमा शिक्षकको हकहितका विषय उपेक्षा गरिएको दाबी गर्दै तत्काल संशोधन गरेर माग समावेश गर्न सरकार र दलहरूमाथि दबाब बढाएको हो । उनीहरूले माग सम्बोधन नभए आगामी भदौ २१ गतेदेखि कडा आन्दोलन घोषणा गर्ने पनि चेतावनी दिएका छन् ।

धर्ना कार्यक्रममा सहभागी शिक्षकहरूले दलका कार्यालय अगाडि नाराबाजी गर्दै मागपत्र बुझाएका थिए । उनीहरूले शिक्षालाई राजनीतिक हस्तक्षेपबाट मुक्त गर्ने, शिक्षकको सेवा–सुविधा सुनिश्चित गर्ने र ऐनमार्फत दीर्घकालीन समाधान खोज्ने आवश्यकता रहेको बताए ।

शिक्षक महासंघले भनेको छ, ‘हाम्रो आन्दोलन राजनीतिक दल वा सरकारले गम्भीरतापूर्वक नलिए शिक्षा प्रणाली नै संकटमा पर्छ । त्यसैले विद्यालय शिक्षा विधेयकमा हामीले उठाएका प्रमुख मागहरू तत्काल समावेश हुनैपर्छ ।’