वीरगंज, १२ भदौ । संघीय शिक्षा ऐनमार्फत निजी विद्यालयलाई कमजोर पार्ने र अन्ततः बन्द गर्ने खालका प्रावधान ल्याउन लागेको भन्दै मधेश प्रदेशभरका निजी विद्यालय सञ्चालकहरूले बिहीबार वीरगंजमा बृहत् विरोध प्रदर्शन गरेका छन् ।

प्याब्सन, नेशनल प्याब्सन, हिसान, अपेनलगायतका निजी तथा आवासीय विद्यालय सञ्चालक संगठनहरूको संयुक्त आयोजनामा भएको विरोध ¥याली पुरानो बसपार्कबाट सुरु भई शहरका विभिन्न मार्ग परिक्रमा गर्दै जिल्ला प्रशासन कार्यालय अगाडि कोण सभामा परिणत भएको हो ।

कार्यक्रमको संयोजन प्याब्सन पर्साका जिल्ला अध्यक्ष सरोज प्रसाद चौधरीले गरेका थिए । कोणसभामा प्याब्सन महानगर अध्यक्ष राहुल श्रीवास्तव, सचिव अमित आलोक, वरिष्ठ उपाध्यक्ष सुशिला साह, एन–प्याब्सनका सल्लाहकार प्रेम यादव, हिसान पर्साका अध्यक्ष मुकेश गुप्ता, प्याब्सन मधेश प्रदेश उपाध्यक्ष पुरन प्रधान, सल्लाहकार इमामुद्दिन अहमद, पूर्व वरिष्ठ उपाध्यक्ष श्याम केसी, संस्थापक सदस्य लालबाबु पटेल, एन–प्याब्सन वीरगंज अध्यक्ष जियालाल गुप्ता, सचिव शेख अजहरलगायतको उपस्थिति थियो ।

विरोधमा सहभागी विद्यालय सञ्चालकहरूले शिक्षा ऐनका प्रावधानले निजी विद्यालयहरूको अस्तित्व नै संकटमा पार्ने भन्दै तत्काल संशोधन गर्न सरकारलाई आग्रह गरे । उनीहरूले विद्यालयहरूको दिगोपन, शिक्षक–कर्मचारीको हकअधिकार, पाठ्यक्रम व्यवस्थापन र शैक्षिक गुणस्तर सुनिश्चित हुने गरी विधेयक पुनर्लेखन गर्नुपर्ने आवश्यकता औंल्याए ।

सभा सम्बोधन गर्ने विभिन्न वक्ताहरूले शिक्षा क्षेत्रमा निजी विद्यालयको योगदानलाई राज्यले नजरअन्दाज गर्न नहुने चेतावनी दिए । ‘निजी विद्यालयमाथि अन्याय हुने गरी शिक्षा ऐन ल्याइयो भने थप सशक्त आन्दोलन अपरिहार्य हुन्छ,’ एकजना वक्ताले चेतावनी दिए ।

कार्यक्रमको अन्त्यमा सहायक प्रमुख जिल्ला अधिकारी बाबुलाल रेग्मीलाई ज्ञापनपत्र बुझाइएको थियो । ज्ञापनपत्रमार्फत निजी विद्यालयहरूको अस्तित्व संरक्षण, शैक्षिक गुणस्तर प्रवद्र्धन र सबै पक्षलाई समेट्ने गरी ऐन पुनर्लेखन गर्न माग गरिएको छ ।