महोत्तरी, १२ भदौ । महोत्तरीको मटिहानी नगरपालिकाले उच्च शिक्षामा छात्राहरूको पहुँच सहज बनाउन यस वर्ष पनि साइकल वितरण गरेको छ ।

नगर अन्तर्गतको श्रीराम माध्यमिक विद्यालय मटिहानीमा अध्ययनरत कक्षा ११ का छात्राहरुलाई बिहीबार एक औपचारिक समारोहबीच साइकल वितरण गरिएको हो ।

कार्यक्रममा मटिहानी नगर प्रमुख हरि प्रसाद मण्डल र महोत्तरीका प्रमुख जिल्ला अधिकारी नारायण प्रसाद रिसालले संयुक्त रुपमा छात्राहरुलाई साइकल हस्तान्तरण गरेका थिए ।

नगर प्रमुख मण्डलले मटिहानी नगरपालिकाले विगत सात वर्षदेखि छात्राहरुलाई नियमित रूपमा साइकल वितरण गर्दै आएको उल्लेख गर्दै यस कार्यक्रमले शिक्षा क्षेत्रमा उल्लेख्य सकारात्मक परिणाम दिएको बताए ।

‘साइकल वितरणका कारण नजिकै मात्र नभई छिमेकी गाउँ र पालिकाबाट समेत विद्यार्थीलाई विद्यालय आउजाउ गर्न सहज भएको छ । यसले छात्राहरुमा पढाइप्रति उत्साह बढाएको छ,’ मण्डलले भने ।

त्यस्तै, प्रमुख जिल्ला अधिकारी रिसालले साइकलले विद्यार्थीको आत्मबल र भावनात्मक विकाससँगै नियमित पढाइमा योगदान पुग्ने धारणा राखे । उनले पालिकाले ल्यापटप वितरणलगायत शिक्षा क्षेत्रमा गरेका अन्य कार्यक्रमलाई समेत सराहनीय भन्दै निरन्तरता दिन आग्रह गरे ।

विद्यालयका प्रधानाध्यापक श्रीश कुमार मिश्राका अनुसार यस वर्ष कक्षा ११ मा अध्ययनरत ५८ जना छात्रालाई साइकल वितरण गरिएको हो । विद्यालयमा मटिहानी, सिमरदही, बहुरवा, सुगा, पर्सा पतैली, सिरसिया, धिरापुरसहित धनुषा जिल्लाको तुल्सियाही मुखियापट्टी र मुसरनियाबाट समेत विद्यार्थी पढ्न आउने गरेका छन् ।

साइकल वितरण कार्यक्रममा जिल्ला प्रहरी कार्यालय महोत्तरीका प्रहरी उपरीक्षक हेरम्भ शर्मा, वडा नं. ६ र ८ का वडा अध्यक्षहरू, महोत्तरी उद्योग वाणिज्य संघका उपाध्यक्ष पवन साह र अजय कुमार साह, या.ल.ना. विद्यापीठ मटिहानीका प्राचार्य हेम नारायण कर्ण, विभिन्न राजनीतिक दलका प्रतिनिधि, कार्यपालिका सदस्य, शिक्षक, अभिभावक र विद्यार्थीहरूको उपस्थिति थियो ।

स्थानीय अभिभावकहरूले नगरपालिकाले शिक्षा क्षेत्रमा गरिरहेको योगदानको प्रशंसा गर्दै आगामी दिनमा पनि यस किसिमका कार्यक्रमलाई निरन्तरता दिनुपर्ने धारणा व्यक्त गरेका छन् ।