जनकपुरधाम, १२ भदौ । जनकपुरधामस्थित मोनाष्टिक आवासिय माध्यमिक विद्यालयका निर्देशक डा. सोनु साहले सिंगापुरमा सम्पन्न गुगल सिम्पोजियममा प्रतिनिधित्व गर्दै शिक्षा र नवप्रवर्तनका अनुभव साझा गरेका छन् ।

यस सिम्पोजियममा एशिया–प्यासिफिक क्षेत्रका १०५ जना शिक्षक र करिब २५ जना गुगल कर्मचारी सहभागी भएका थिए ।

नेपालबाट सहभागी डा. साहलाई एशियाका ६ जना शिक्षकमध्ये एकको रूपमा चयन गरिएको थियो । उनी ‘च्याम्पियन्स स्टोरी’ प्रस्तुतिमार्फत नेपाल, मोनाष्टिक तथा गुगल एजुकेटर ग्रुप जनकपुरधामको प्रतिनिधित्व गर्न सफल भएका छन् ।

डा. साहले आफ्नो अनुभवलाई जीवनभर स्मरणीय क्षणको रूपमा वर्णन गर्दै सिम्पोजियममा नयाँ सीप हासिल गर्ने, विचारहरू साझा गर्ने र प्रेरणादायी समुदायको हिस्सा बन्न पाउँदा गौरवान्वित भएको बताए ।

गुगल फॉर एजुकेशन समुदायले शिक्षकहरूलाई सिक्न, साझा गर्न र सँगै विकास गर्न प्रेरणादायी वातावरण सिर्जना गरेकोमा डा. साहले धन्यवाद व्यक्त गरेका छन् ।

सिम्पोजियमले शिक्षकहरूलाई नयाँ शैक्षिक प्रविधि, सिकाइ रणनीति र अन्तर्राष्ट्रिय शिक्षक समुदायसँग नेटवर्किङको अवसर प्रदान गरेको छ । यस किसिमको अनुभवले सहभागी शिक्षकको पेशागत विकासमा ठूलो योगदान पुग्ने विश्वास गरिएको छ ।