जनकपुरधाम, १० भदौ । वीरगंजमा झाडापखालाका बिरामीहरूमा हैजाको संक्रमण कल्चर टेष्टमार्फत पनि पुष्टि भएको छ । यसअघि कीट टेष्टमार्फत हैजा देखिएको भए पनि जनकपुर र काठमाडौंको प्रयोगशालामा गरिएको कल्चर टेष्टले पनि समान जीवाणु पत्ता लगाएको छ ।

गत शुक्रबारदेखि वीरगंजका विभिन्न वडामा हैजाका लक्षण देखिएका बिरामीहरू अस्पताल भर्ना हुन थालेपछि मधेश प्रदेशको प्रादेशिक स्वास्थ्य निर्देशनालयको टोलीले शनिबार नारायणी अस्पताल र तराई हस्पिटलमा उपचाररत ३२ बिरामीको दिसाको नमूना संकलन गरेको थियो । तीमध्ये २२ वटा नमूना जनकपुरस्थित प्रादेशिक जनस्वास्थ्य प्रयोगशालामा र बाँकी १० वटा नमूना काठमाडौंस्थित राष्ट्रिय जनस्वास्थ्य प्रयोगशालामा परीक्षणका लागि पठाइएको थियो ।

जनकपुरको प्रादेशिक जनस्वास्थ्य प्रयोगशालाका मेडिकल ल्याब टेक्निसियन रामेश्वर दासका अनुसार १२ वटा नमूनामा हैजाको जीवाणु भिब्रियो कोलेरा पुष्टि भएको छ । बाँकी १० नमूनाको कल्चर टेष्ट भने प्रक्रियामा रहेको र रिपोर्ट सम्भवतः बुधबार आउने बताए ।

त्यसैगरी, काठमाडौंको राष्ट्रिय जनस्वास्थ्य प्रयोगशालाका प्रमुख डा. रञ्जन भट्टले १० मध्ये ८ वटा नमूनामा हैजा पुष्टि भएको जानकारी दिएका छन् । बाँकी दुई नमूनाको रिपोर्ट पनि बुधबारसम्म आउने बताइएको छ ।

स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार कल्चर टेष्टको रिपोर्टले वीरगंजमा हैजाको संक्रमण समुदायस्तरमै फैलिएको पुष्टि भएको छ । यसबाट बिरामी संख्या बढ्ने र समुदायमा संक्रमण फैलिने जोखिम उच्च रहेको भन्दै स्वास्थ्य मन्त्रालय र स्थानीय निकायहरूले सतर्कता अपनाउन आग्रह गरेका छन् ।

मधेश प्रदेश स्वास्थ्य विभागले संक्रमित क्षेत्रहरूमा विशेष निगरानी बढाएको छ भने स्वच्छता, पिउने पानीको सुरक्षा, र समयमै उपचारको लागि स्वास्थ्य सामग्रीको व्यवस्था गर्न निर्देशन जारी गरेको छ ।

स्वास्थ्य विशेषज्ञहरूले संक्रमण रोक्न व्यक्तिगत सरसफाइ, हात धुने, उमालेर वा सुरक्षित पानी पिउने र बिरामीलाई तुरुन्त स्वास्थ्य संस्थामा लैजाने उपायहरू अपनाउन आग्रह गरेका छन् ।

स्वास्थ्य कार्यालय पर्साका जनस्वास्थ्य अधिकृत ठाकुरका अनुसार मंगलबार साँझसम्म ९३ जना झाडापखालाका बिरामी अस्पताल भर्ना भएका छन् । पछिल्लो परीक्षण रिपोर्ट अनुसार ११४ जनामा हैजाको संक्रमण पुष्टि भएको छ ।