जनकपुरधाम, ९ भदौ । रौतहटको गौरमा शनिबार राति सुटकेसभित्र शव फेला परेको २६ वर्षीया रुबी साहको हत्या गौर नगरपालिका–५ स्थित एक घरमा भएको प्रहरीले पुष्टि गरेको छ ।

प्रारम्भिक अनुसन्धान अनुसार माधवनारायण नगरपालिका–२ का स्थायी बासिन्दा लक्ष्मण पासवानले हत्या गरी शव व्यवस्थापन गरेका थिए ।

शुक्रबार साँझ करिब ६ बजे आमा मिथिला देवीलाई ‘केही सामान ल्याउन बजार जाँदैछु’ भनेर घरबाट निस्किएकी रुबी त्यसपछि सम्पर्कविहीन भएकी थिइन् । राति १० बजे गौर–सिरसिया सडकखण्डअन्तर्गत गौर नगरपालिका–९ मुडवालगेट नजिकै शंकास्पद सुटकेस फेला परेपछि प्रहरीलाई जानकारी गराइएको थियो । आइतबार बिहान सुटकेस खोल्दा रुबीको शव भेटिएको थियो ।

प्रहरीका अनुसार पासवानले शव फाल्न गौरको कबिरचोकबाट ई–रिक्सा भाडामा लिएका थिए । उनी सुटकेससहित बरहवा पुलतर्फ हिँड्दा रिक्साको पाङ्ग्रा बिग्रिएको र चालकले अर्को रिक्सा उपलब्ध गराउन खोज्दा पासवानले अस्वीकार गरी पैदल अघि बढेका थिए । ई–रिक्सा चालक राजकुमार महरालाई प्रहरीले नियन्त्रणमा राखेको छ । महराको बयान अनुसार सुटकेसमा के थियो उनलाई थाहा थिएन ।

अनुसन्धानमा संलग्न प्रहरीले पासवानको गौर–५ बालमन्दिर पछाडिको डेरा चेक गर्दा रुबी साहको चप्पल र अन्य सामग्री बरामद गरेको छ । घटना योजनाबद्ध भएको देखिएको छ भने पासवान फरार रहेका छन् । प्रहरीले उनको खोजी तीव्र पारेको जनाएको छ ।

प्रहरीले घटनास्थलबाट थप प्रमाण संकलन गर्दै अनुसन्धान अगाडि बढाएको छ ।