जनकपुरधाम, ९ भदौ । नेपाल सरकारले प्रस्ताव गरेको विद्यालय शिक्षा विधेयक २०८० का केही प्रावधानविरुद्ध निजी विद्यालय छाता संगठनहरूले सोमबार जनकपुरधाममा विरोध प्रदर्शन गरेका छन् ।

प्याब्सन, नेसनल प्याब्सन, हिसान र अपेनको संयुक्त आह्वानमा भएको विरोध कार्यक्रममा मधेश प्रदेशका आठै जिल्लाबाट निजी विद्यालय सञ्चालक, शिक्षक तथा पदाधिकारीहरूको बाक्लो उपस्थिति रहेको थियो ।

विरोध कार्यक्रम जनकपुरधाम–४ स्थित महेन्द्र नारायण निधि मिथिला सांस्कृतिक भवन अगाडिबाट शुरु भएर नाराबाजीसहित प्रदेशसभा भवन अगाडि धर्नामा परिणत भएको थियो ।

कार्यक्रममा सम्बोधन गर्दै प्याब्सन मधेश प्रदेश अध्यक्ष गणेश साहले हालको विधेयक निजी विद्यालयहरूको अस्तित्वमै खतरा हुने खालको रहेको भन्दै त्यसको विरोधमा सडकमा उत्रिन बाध्य भएको बताए । उनले भने, ‘निजी विद्यालयहरूलाई पाँच वर्षभित्र गैरनाफामूलक शैक्षिक गुठीमा रूपान्तरण गर्नुपर्ने प्रावधान लगानीकर्तालाई हतोत्साहित गर्ने षड्यन्त्र हो ।’

त्यस्तै, हिसान मधेश प्रदेश अध्यक्ष वीरेन्द्र साहले शिक्षण शुल्क, परीक्षा शुल्क, पाठ्यपुस्तक, पोशाक र यातायातजस्ता सेवाहरू निःशुल्क गर्नुपर्ने प्रावधान व्यवहारिक नभएको उल्लेख गर्दै सरकारसँग तत्काल संवादमार्फत समस्या समाधान गर्न आग्रह गरे । उनले भने, ‘शिक्षा समितिमा निजी क्षेत्रलाई प्रतिनिधित्व नदिने व्यवस्था लोकतान्त्रिक मूल्य र मान्यताको उल्लङ्घन हो ।’

संगठनहरूले संयुक्त वक्तव्य जारी गर्दै विधेयक यथावत पारित भए आन्दोलनलाई थप कडा बनाउने चेतावनी दिएका छन् । उनीहरूले माग सम्बोधन नभए सम्पूर्ण निजी विद्यालयहरू अनिश्चितकालीन रूपमा बन्द गर्ने घोषणा पनि गरेका छन् ।

विरोध कार्यक्रममा सहभागी विद्यालय सञ्चालकहरूले सरकारले ल्याउन लागेको विधेयकले गुणस्तरीय शिक्षामा निजी क्षेत्रको योगदानलाई बेवास्ता गरेको र यसका कारण आम विद्यार्थी तथा अभिभावकको हितमा नकारात्मक प्रभाव पर्ने चेतावनी दिएका थिए ।