जनकपुरधाम, ८ भदौ । मधेश प्रदेश सरकारले मधेशी शहीद प्रतिष्ठानमार्फत शहीद परिवारका लागि सञ्चालन गरेको निःशुल्क स्वास्थ्य बीमा कार्यक्रम अन्तर्गत हालसम्म १४० परिवार प्रत्यक्ष लाभान्वित भएका छन् ।

प्रतिष्ठानका अध्यक्ष इन्जिनियर शुभम् यादवका अनुसार मधेश आन्दोलन र माओवादी सशस्त्र विद्रोहका क्रममा शहादत प्राप्त परिवारलाई प्रमाण–आधारित स्वास्थ्य बीमा प्रदान गर्ने कार्यक्रम निरन्तर जारी राखिएको छ ।

यसअघि मधेश आन्दोलनका शहीद परिवारका पाँच–पाँच सदस्यको बीमा गरिएको थियो भने हाल यसलाई दायरा बढाउँदै माओवादी विद्रोह र मधेश आन्दोलन दुवैका शहीद परिवारलाई लक्षित गरिएको छ । अध्यक्ष यादवका अनुसार प्रतिष्ठानले आगामी दिनमा १ हजार ६ जना शहीद परिवार र आन्दोलनमा घाइते वा अङ्गभङ्ग भएका १६४ जनाको स्वास्थ्य बीमा गर्ने लक्ष्य राखेको छ ।

कार्यक्रमअनुसार प्रत्येक शहीद परिवारका पाँच सदस्यसम्मको बीमा प्रीमियम प्रदेश सरकारले व्यहोर्दै आएको छ । प्रत्येक परिवारका लागि एकमुष्ट ३ हजार ५ सय रुपैयाँ बीमा शुल्क भुक्तानी गरिने व्यवस्था छ भने पाँच भन्दा बढी सदस्य भएमा अतिरिक्त रकम परिवारले स्वयं बीमा कम्पनीलाई बुझाउनुपर्ने व्यवस्था गरिएको छ ।

शहीद परिवारका सदस्य मिना पौडेलले बीमा कार्यक्रमले स्वास्थ्य उपचारमा ठूलो सहजता दिएको अनुभव सुनाइन् । महोत्तरी जिल्ला प्रशासन कार्यालयमा कम्प्युटर अपरेटरका रूपमा कार्यरत पौडेलले आँखाको उपचारबीच आर्थिक रूपमा सहजता पाएको बताइन् । अध्यक्ष यादवले भने, ‘आर्थिक दृष्टिले कमजोर भएका परिवारका लागि यो कार्यक्रम जीवनोपयोगी राहतको रूपमा देखिएको छ ।’

२०८०÷८१ सालदेखि दीर्घकालीन योजना अनुसार सुरु गरिएको स्वास्थ्य बीमा कार्यक्रमले मधेश प्रदेशमा शहीद परिवारका लागि प्रदेशस्तरीय निःशुल्क बीमाको पहिलो उदाहरण प्रस्तुत गरेको छ । शहीद परिवारका प्रतिनिधिहरूले यसलाई न्यायोचित र प्रभावकारी निर्णय ठहराउँदै कार्यक्रमलाई अझ व्यापक बनाउन आग्रह गरेका छन् ।

प्रतिष्ठानले यसलाई दीर्घकालीन योजनाको रूपमा अघि बढाउने प्रतिबद्धता जनाएको छ । यसले शहीद परिवारका सदस्यहरूलाई स्वास्थ्य उपचारमा निरन्तर सहजता र जीवन संरक्षणको सुनिश्चितता दिने विश्वास व्यक्त गरिएको छ ।