जनकपुरधाम, ८ भदौ । मिथिलाको प्रसिद्ध लोकपर्व चौरचन (चौठचन्द्र) नजिकिँदै गर्दा जनकपुरधामको पेठिया बजारमा बाँस र माटोका सामग्रीको व्यापार चहकिलो बनेको छ ।

विशेषगरी रंगीबिरंगी सूप, डलिया, टोकरी, माटोका दियो, मट्का (दही जमाउने भाँडो) र बाटोका ढकनीजस्ता परम्परागत सामग्रीको माग उल्लेख्य रूपमा बढेको छ ।

स्थानीय व्यापारी निलम कुमारीले भनिन्, ‘सामान्यतया दैनिक २–४ वटा मात्र बिक्री हुने सामान अहिले ४०–५० वटासम्म बिक्री हुन्छ । चौरचनमा चन्द्रलाई अर्घ दिने परम्परागत चलन भएकाले यो समय हाम्रो व्यापारका लागि सुनौलो अवसर हो ।’

वर्षभरि माटोका भाँडा बनाउने कुम्हाल समुदायका महिला सुखनी देवी पण्डितले भनिन्, ‘हामी वर्षभरि भाँडा बनाउँछौं । तर, चौरचनजस्तो बेला सबैभन्दा बढी आम्दानी हुन्छ । विशेष गरी दही जमाउने भाँडाको माग धेरै हुन्छ । बजारमा राख्नेबित्तिकै बिक्री हुन्छ ।’

ग्राहकहरूले पनि चौरचनको अवसरमा प्लास्टिकको सट्टा परम्परागत बाँस र माटोका भाँडो रोज्न थालेका छन् । पेठिया बजारकी रुवि कुमारी भन्छिन्, ‘यसले संस्कृति मात्र नभई वातावरणलाई पनि जोगाउँछ ।’

मिथिलामा प्रचलित चौरचन पर्वमा घरपरिवारले चन्द्रमालाई अर्घ दिने परम्परा रहेको र अर्घ दिने सामग्रीको रूपमा परम्परागत बाँस र माटोका भाँडोको प्रयोग हुने भएकाले किसान, कारीगर र व्यापारी सबैका लागि यो पर्व आम्दानी र रोजगारीको अवसर बनेको छ ।

व्यापारी तथा समुदायका अगुवाहरूले पर्वले सांस्कृतिक मूल्य, परम्परागत हस्तकला संरक्षण र स्थानीय उत्पादनको प्रोत्साहनमा महत्वपूर्ण भूमिका खेल्ने बताएका छन् ।