जनकपुरधाम, ८ भदौ । आर्ट अफ लिभिङ जनकपुरधामको आयोजनामा रोगमुक्त शरीर, तनावमुक्त मन र हिंसामुक्त समाज निर्माणको उद्देश्यसहित चार दिने ‘ह्यापिनेस कोर्स’ सम्पन्न भएको छ ।

भदौ ४ गतेदेखि सुरु भएको कोर्समा विभिन्न पेशा र क्षेत्रका ४५ जना सहभागी थिए । कार्यक्रममा आर्ट अफ लिभिङका अन्तर्राष्ट्रिय प्रशिक्षक चन्देश्वर भैया, मधेश प्रदेशका मुख्य न्यायाधिवक्ता समेत रहेका प्रशिक्षक सुरेन्द्रकुमार महतो र प्रशिक्षक सुधीर ठाकुरले ध्यान, योग, प्राणायाम तथा सुदर्शन क्रियाको अभ्यास गराएका थिए ।

आर्ट अफ लिभिङ नेपालका स्वयंसेवक ओमकुमार साहका अनुसार सहभागीहरूले नियमित अभ्यासमार्फत मानसिक शान्ति, शारीरिक स्वास्थ्य र सकारात्मक सोचलाई आफ्नो जीवनशैलीमा उतार्ने अवसर पाएका छन् ।

समापन कार्यक्रममा प्रादेशिक अस्पताल, गौरका मेडिकल सुपरिन्टेन्डेन्ट डा. मुरारी ठाकुरले मधेश प्रदेशमा साक्षरता दर न्यून हुनु र समाज तुलनात्मक रूपमा कम विकसित हुनु नैतिक मूल्यमा आधारित जीवनशैलीको आवश्यकता बढाएको बताए ।

संस्थापक रविशंकरले ध्यान, योग र प्राणायामजस्ता अभ्यासले व्यक्तिको जीवनलाई स्वस्थ, सन्तुलित र आनन्दमय बनाउने मात्र नभई यसको प्रभावले समाजमा शान्ति, प्रेम र अहिंसाको स्थापनामा पनि सहयोग पुग्ने विश्वास व्यक्त गरे ।

कार्यक्रमले सहभागीलाई व्यक्तिगत स्वास्थ्य र मानसिक सन्तुलनसँगै समाजमा सकारात्मक योगदान पुर्याउने अभ्यासमार्फत जीवनशैलीमा सुधार गर्ने अवसर प्रदान गरेको आयोजकले बताएको छ ।