रौतहट, ८ भदौ । रौतहटको गौर–सिरसिया सडकखण्डमा फालिएको अवस्थामा सुटकेसभित्र भेटिएकी महिलाको सनाखत भएको छ ।

मृतक गौर नगरपालिका–२ महादेवपट्टिमा डेरामा बस्दै आएकी २६ वर्षीया रुवी साह सुडी भएको जिल्ला प्रहरी कार्यालय रौतहटका डिएसपी राजु कार्कीले जानकारी दिएका छन् ।

घटनास्थल गौर नगरपालिका–९ स्थित मुठवलबा गेट नजिकको सुनसान स्थान हो । शनिबार बिहान स्थानीयले सुटकेस देखेपछि शंका गर्दै प्रहरीलाई खबर गरेका थिए । सुटकेसभित्र खोल्दा घुँडा मोडेर बेरिएको अवस्थामा महिलाको शव भेटिएको थियो । शव सड्न थालेको अवस्था देखिएकोले केही दिनअघि हत्या गरिएको अनुमान गरिएको छ ।

माधवनारायण नगरपालिका–६ माइती भएकी रुवीले केही वर्षअघि भारतमा विवाह गरेकी थिइन् । वैवाहिक सम्बन्धका बारेमा खुलेर विवरण बाहिर आएको छैन । पछिल्लो समय उनी आफ्नो ४ वर्षीय छोरालाई गौर नगरपालिका–२ स्थित महादेवपट्टिको डेरामा राखेर शिक्षादीक्षा दिलाउने उद्देश्यले बस्दै आएकी थिइन् ।

डिएसपी कार्कीका अनुसार शवको अवस्थाबाट हेर्दा घटनामा संलग्न व्यक्तिहरूले योजनाबद्ध रूपमा हत्या गरेर प्रमाण नष्ट गर्ने मनसायले सुटकेसभित्र राखेर शव फालेका हुनसक्ने अनुमान गरिएको छ । ‘नाकबाट रगत बगेको देखिए पनि शरीरमा बाह्य चोटपटक देखिएको छैन,’ उनले भने, ‘हत्या कुनै दबाबजन्य तरिकाले वा विष प्रयोग गरेर गरिएको हुन सक्ने आशंका छ ।’

रुवीको माइती पक्ष प्रहरी सम्पर्कमा आइसकेको छ । उनका श्रीमान् पनि हाल भारतबाट नेपाल फर्किएका छन् र घटनासँग सम्बन्धित बयानका लागि प्रहरी अनुसन्धानमा रहेका छन् । घटनाको अनुसन्धानका लागि प्रहरीले सुटकेसको उत्पत्ति, मृतकको मोबाइल र सम्पर्कमा आएका व्यक्तिहरूको विवरण खोतलिरहेको छ ।

प्रहरीले घटनास्थल वरपरको सीसीटीभी फुटेज संकलन गर्ने काम थालेको छ भने डेरा लगायतका ठाउँबाट रुवीको सामाजिक गतिविधि, फोन कल डिटेल र सम्भावित संलग्न व्यक्तिहरूबारे पनि अनुसन्धान भइरहेको डिएसपी कार्कीले बताए ।

सुटकेसभित्र शव भेटिएको खबरले गौर आसपासको क्षेत्रमा त्रासको वातावरण सिर्जना भएको छ । स्थानीय बासिन्दाहरूले अपराधिक घटनामा बढोत्तरी भएको भन्दै प्रहरी प्रशासनलाई गम्भीर बन्न आग्रह गरेका छन् ।