वीरगञ्ज, ८ भदौ । वीरगञ्जमा हैजाको सङ्क्रमण तीव्र रूपमा फैलिँदै गएपछि महानगरपालिकाले नियन्त्रणका लागि विशेष अभियान सञ्चालन गरेको छ । हालसम्म ३९ जनामा हैजा पुष्टि भइसकेको छ भने २ सयभन्दा बढी बिरामी विभिन्न अस्पतालमा उपचाररत छन् ।

महानगर प्रमुख राजेशमान सिंह आफैँ अस्पताल र प्रभावित क्षेत्रको स्थलगत अनुगमनमा सक्रिय छन् । शनिबार साँझ सिंह वीरगञ्ज हेल्थकेयर अस्पताल पुगेर बिरामीहरूको अवस्थाबारे जानकारी लिएका थिए ।

सो अस्पतालमा १४ भन्दा बढी झाडापखालाका बिरामी उपचाररत छन् । यसअघि उनी नारायणी अस्पताल पुगेर ३३ बिरामीहरूसँग भेटघाट गरेका थिए, तीमध्ये १३ जनामा हैजा पुष्टि भएको छ ।

महानगरपालिकाले प्रभावित क्षेत्रमा हालसम्म २५ वटा स्वास्थ्य टोली खटाएको छ । ती टोलीहरू घरघरमा पुगेर सरसफाइबारे जनचेतना फैलाउँदै पानीमा क्लोरिन हालेर मात्र पिउन आग्रह गरिरहेका छन् । साथै प्रभावित बस्तीहरूमा नालामा औषधि छर्ने कार्य पनि जारी छ ।

महानगर प्रमुख सिंहले संकट नियन्त्रणलाई सर्वोच्च प्राथमिकता दिएको बताउँदै भने, ‘कुनै पनि अवस्थामा लापरबाही गर्न हुँदैन । हामी सबैको सहयोगमा यो संकटलाई नियन्त्रणमा लिन प्रतिबद्ध छौं ।’

सङ्क्रमण नियन्त्रणलाई थप प्रभावकारी बनाउन वीरगञ्ज महानगरपालिकाले हेल्प डेस्क र सूचना केन्द्र स्थापना गरेको छ । साथै, एम्बुलेन्ससहितका आपतकालीन सवारी साधनलाई तत्पर अवस्थामा राखिएको छ ।

महानगरपालिकाले वीरगञ्जवासीहरूलाई शुद्ध पानी पिउन, व्यक्तिगत सरसफाइमा ध्यान दिन र हैजाका लक्षण देखिएमा तुरुन्त नजिकको स्वास्थ्य संस्थामा सम्पर्क गर्न आग्रह गरेको छ ।