वीरगंज, ७ भदौ । वीरगंज महानगरमा अचानक हैजा संक्रमण फैलिएको छ । सुदायस्तरमै फैलावट देखिएको भन्दै महानगरपालिकाले प्राथमिक स्वास्थ्य सेवा र सचेतना अभियान तीव्र बनाएको छ ।

शुक्रबार राति मुर्ली टोल (वडा नम्बर १२) मा हैजा संक्रमण देखिएपछि स्वास्थ्यकर्मीको टोली तुरुन्त परिचालन गरिएको थियो । शनिबारसम्ममा वडा नम्बर ११, १२, १३ र १६ मा संक्रमण फैलिएको पाइएको छ ।

प्रारम्भिक परीक्षणमा २८ जनामा हैजाको जीवाणु ‘भिब्रियो कोलेरा’ पुष्टि भएको छ भने झाडापखालाबाट ३ जनाको मृत्यु भएको छ । तथापि, मृत्युको कारणले हैजासँग प्रत्यक्ष सम्बन्ध छ कि छैन भन्ने पुष्टि हुन बाँकी छ ।

महानगर प्रमुख राजेशमान सिंहले सबै जनशक्ति, साधन र स्रोत परिचालन गरी संक्रमित वडामा सतर्कता बढाउन निर्देशन दिएका छन् । ३२ वडाका स्वास्थ्यकर्मीहरू तत्काल परिचालन गरिएको छ भने आकस्मिक अवस्था व्यवस्थापनका लागि औषधी, एम्बुलेन्स र अन्य साधन स्ट्यान्डबाइमा राखिएका छन् ।

स्वास्थ्यकर्मीहरूले घरघर सचेतना अभियान सञ्चालन गर्दै हातधुने, सफा खानेपानी प्रयोग गर्ने र व्यक्तिगत सरसफाइमा ध्यान दिन जनतालाई आग्रह गरेका छन् । महानगरले खानेपानीमा क्लोरिन हाल्ने, उमालेर मात्र खाने र सुरक्षित खानेपानी प्रयोग गर्न समेत अनुरोध गरेको छ ।

नारायणी अस्पताल, तराई अस्पताल, वीरगंज हेल्थकेयर र अन्य स्वास्थ्य संस्थामा झाडापखालाका बिरामीको चाप बढेको छ । पर्सा जनस्वास्थ्य कार्यालयका अधिकृत जयमोद ठाकुरका अनुसार संक्रमणको सुरु बिन्दु मुर्ली टोलको नयाँ टोल थियो । त्यहाँ ३० जनामा झाडापखालाका लक्षण देखिएका थिए ।

महानगरले स्वास्थ्य संस्थासँग समन्वय गर्दै संक्रमितको निगरानी, उपचार र समुदायमा सचेतना फैलाउने कार्यक्रमलाई तीव्र बनाएको छ ।

यसैबीच, महानगरले हैजा नियन्त्रणका लागि समन्वित टोलीमार्फत घरघर स्वास्थ्य परीक्षण र समुदायमा सचेतना कार्यक्रम निरन्तर सञ्चालन गर्ने योजना अघि सारेको छ ।