वीरगंज, ७ भदौ । पर्साको वीरगंजमा हैजा र झाडापखालाका बिरामीको संख्या बढ्दै गएपछि संघीय सरकार सक्रिय भएको छ ।

खानेपानी, सरसफाइ तथा ढल व्यवस्थापन मन्त्री प्रदीप यादवको निर्देशनमा विभागले विशेष टोलीसहित मोबाइल भ्यान परिचालन गरेर खानेपानी परीक्षण शुरु गरेको छ । शनिबार वीरगंज पुगेका मन्त्री यादवले मूर्ली र नारायणी अस्पतालमा उपचाररत बिरामीहरूको अवस्थाबारे जानकारी लिँदै प्रत्यक्ष निरीक्षण गरे ।

उनले अस्पतालमा बिरामी भेटेर खानेपानीको स्रोत, सरसफाइ र ढल व्यवस्थापन प्रणालीको अवस्था नजिकैबाट अवलोकन गरेको मन्त्रालयले जनाएको छ । मन्त्री यादवले भने, ‘तराई–मधेशसहित विशेषगरी वीरगंज क्षेत्रमा खानेपानीको समस्या गम्भीर छ । अहिले यहाँ हैजाका बिरामी देखिनु चिन्ताजनक अवस्था हो । त्यसैले पानी परीक्षण र रोग नियन्त्रणका लागि मोबाइल टोली खटाइएको छ ।’

यादवले प्रभावित क्षेत्रमा छिटो नियन्त्रणका लागि स्थानीय प्रशासन, अस्पताल र प्राविधिक निकायबीच समन्वय बढाउन निर्देशन दिए । उनले हैजा नियन्त्रणका लागि सरकार पूर्ण रूपमा संवेदनशील रहेको भन्दै पीडित क्षेत्रमा पानी शुद्धीकरणका सामग्री र औषधि तत्कालै उपलब्ध गराइने बताए ।

खानेपानी तथा ढल व्यवस्थापन विभागका महानिर्देशक इन्जिनियर रामकुमार श्रेष्ठका अनुसार मोबाइल टोलीसँगै ‘पीयूष’ लगायत आवश्यक सामग्रीहरू पनि प्रभावित क्षेत्रमा पठाइएको छ । टोलीले स्थानमै पानीको गुणस्तर परीक्षण गर्ने र आवश्यक सुधारका उपायहरू तत्काल सुझाउने जिम्मेवारी पाएको छ ।

स्थानीयले भने सरसफाइको कमजोरी, सुरक्षित खानेपानीको कमी र ढल व्यवस्थापनको समस्या नै रोग फैलनुको मुख्य कारण भएको गुनासो गरेका छन् । उनीहरूले सरकार र स्थानीय तह दुवैलाई दीर्घकालीन समाधानतर्फ ध्यान दिन आग्रह गरेका छन् ।