सर्लाही, ४ भदौ । सर्लाहीको लालबन्दी नगरपालिका–२ पुनर्वास क्षेत्र पछिल्ला वर्षहरूमा क्षयरोगको संक्रमण तीव्र गतिमा फैलिँदै जाँदा स्वास्थ्य क्षेत्र नै चिन्तित बनेको छ ।

रोग नियन्त्रणका लागि अब स्वास्थ्यकर्मीहरू घरदैलोमै पुगेर बिरामीको उपचार र नयाँ संक्रमितहरूको खोजी अभियान सञ्चालन गर्न थालेका छन् ।

आधारभूत स्वास्थ्य सेवा केन्द्र पुनर्वासका प्रमुख सन्तोषकुमार साहका अनुसार पुनर्वास क्षेत्र क्षयरोगको ‘हटस्पट’ बन्न थालेको छ । उनका अनुसार आर्थिक वर्ष २०७९/८० मा तीन जना, २०८०/८१ मा आठ जना र २०८१/८२ मा मात्र सो वडामा ३५ जना नयाँ क्षयरोगी फेला परेका छन् ।

‘संक्रमणदर तीव्र गतिमा बढ्दै गएकोले स्वास्थ्यकर्मीहरूलाई उपचार मात्र नभई खोजतलासकै जिम्मेवारी थपिएको छ,’ साहले भने ।

साहका अनुसार हाल नियमित उपचाररत बिरामीलाई स्वास्थ्यकर्मी घरमै पुगेर औषधि सेवनमा सहयोग गर्दै आएका छन् । साथै, शंका लागेका व्यक्तिको घरमै पुगेर खकार सङ्कलन गरी लालबन्दी नगर अस्पतालमा ल्याएर परीक्षण गर्ने कार्य निरन्तर भइरहेको छ ।

‘हामीले जिम्मेवारीभन्दा बाहिरका काम पनि निस्वार्थ भावले गरिरहेका छौँ । खकार बट्टा संकलन गरेर ल्याबमा पुर्याउनेदेखि बिरामीलाई आफ्नै सवारीसाधनमा अस्पताल पुर्याउनेसम्मका काममा स्वास्थ्यकर्मी अग्रपंक्तिमा छन्,’ साहले भने ।

पुनर्वास क्षेत्रमा विशेष गरी दलित समुदायको बसोवास भएकाले संक्रमणको जोखिम उच्च रहेको स्वास्थ्यकर्मीहरूको भनाइ छ । लालबन्दी नगरपालिकाको स्वास्थ्य शाखा प्रमुख मुमताज मिकरानीका अनुसार अशिक्षा, सरसफाइमा कमी र पौष्टिक आहारको अभाव यस रोग फैलिनुका मुख्य कारण हुन् ।

नगरपालिकाले आर्थिक अवस्था कमजोर रहेका बिरामीलाई समय–समयमा खाद्यान्न र पौष्टिक खानेकुरा वितरण गर्दै आएको छ । लालबन्दी नगरपालिकाभित्र अहिले १८५ जना क्षयरोगी रहेका छन् ।

सरकारले क्षयरोगको निःशुल्क औषधि उपलब्ध गराउँदै आएको छ भने उपचारमा कम्तीमा ६ महिना लगातार औषधि सेवन गर्नुपर्ने हुन्छ । चिकित्सकको सल्लाहअनुसार उपचार अवधि थपिन पनि सक्ने उनीहरूको भनाइ छ ।