जनकपुरधाम, ४ भदौ । मधेश प्रदेश सरकारले महोत्तरीको जलेश्वरस्थित प्रादेशिक अस्पतालमा सेवा प्रवाहमा देखिएको लापरबाहीका कारण चार स्वास्थ्यकर्मीलाई स्पष्टीकरण पेश गर्न निर्देशन दिएको छ ।

मुख्यमन्त्री सतिश कुमार सिंहको निर्देशनपछि स्वास्थ्य तथा जनसंख्या मन्त्रालयले अस्पतालका मेडिकल अधिकृत डा. शिखा अधिकारी, डा. सद्रे आलम, स्टाफ नर्स मन्दिका कुमारी यादव र रन्जिता साहलाई तीन दिनभित्र लिखित जवाफ पेश गर्न निर्देशन दिएको हो ।

अस्पतालमा सेवाग्राहीलाई उपचारमा समस्या आएको, स्वास्थ्यकर्मीहरूले आफ्नो जिम्मेवारी प्रभावकारी रूपमा निर्वाह नगरेको र सेवाप्रवाहमा लापरबाही भएको जानकारी प्राप्त भएपछि मन्त्रालयले स्पष्टीकरण माग गरेको जनाएको छ ।

मुख्यमन्त्री सिंहलाई महोत्तरीका विभिन्न संघसंस्थाका प्रतिनिधिहरूले प्रादेशिक अस्पताल जलेश्वरमा उपचार सेवा नपाउँदा नागरिकहरू अकालमा ज्यान गुमाउन बाध्य भएको व्यहोरा बुझाएका थिए । त्यसपछि उनले तत्काल आवश्यक छानविन गर्न मन्त्रालयलाई निर्देशन दिएका थिए ।

स्वास्थ्य तथा जनसंख्या मन्त्री शत्रुधन प्रसाद सिंहले स्पष्टीकरण सोधिएकामाथि आवश्यक परेको खण्डमा कारबाही प्रक्रिया अघि बढाइने स्पष्ट पारेका छन् । मन्त्रालयले प्रारम्भिक सोधपुछ र स्थलगत अनुगमनबाट स्वास्थ्यकर्मीहरूले आचारसंहिता पालना नगरेको, सेवा प्रवाहमा लापरबाही गरेको र सेवाग्राहीलाई हानी पुगेको पाइएको बताएको छ ।

प्रदेश निजामति सेवा ऐन, दफा ८६ को उपदफा १ अनुसार कुनै पनि कर्मचारीले आफ्नो कार्यमा लापरबाही देखाएमा कारबाही गर्न सकिने व्यवस्था रहेको छ । मुख्यमन्त्री तथा मन्त्रिपरिषद कार्यालयले पनि सेवा प्रवाहमा ढिलासुस्ती गर्ने प्रदेश सरकार मातहतका कर्मचारीमाथि आवश्यक कारबाही अघि बढाइने जनाएको छ ।

तीन दिनभित्र स्पष्टीकरण नबुझाइए मन्त्रालयले थप कारबाही अघि बढाउने चेतावनीसमेत दिएको छ ।