जनकपुरधाम, २ भदौ । सात वर्षअघिदेखि सञ्चालनमा रहेको ‘मुख्यमन्त्री बेटी पढाउ–बेटी बचाउ’ योजनाअन्तर्गतको छोरी शिक्षा बीमा कार्यक्रम स्थगित भएको छ ।

चालु आर्थिक वर्ष २०८२/८३ को बजेटमा छोरी शिक्षा बीमाका लागि आवश्यक रकम विनियोजन नभएकाले शिक्षा विकास निर्देशनालयले हाल कार्यक्रम रोकिएको हो ।

शिक्षा विकास निर्देशनालयकी छोरी शिक्षा बीमा कार्यक्रम संयोजक प्रियङ्का यादवका अनुसार बजेट अभावले गर्दा यस वर्ष कार्यक्रम सञ्चालन गर्न असम्भव भएको हो । उनका अनुसार हालसम्म सो कार्यक्रमअन्तर्गत जम्मा १४ हजार ४५३ जना छोरीको बीमा गरिएको छ ।

वर्ष अनुसारको विवरण हेर्दा आव २०७५/७६ मा पाँच हजार ६६६, आव २०७८/७९ मा एक हजार ७०२, आव २०७९/८० मा तीन हजार ३०२, र आव २०८०/८१ मा तीन हजार ७८३ जना छोरीको बीमा गरिएको थियो । यद्यपि, हाल १० हजार छोरीको बीमाको प्रिमियम तिर्न बाँकी रहेको संयोजक यादवले जानकारी दिइन् ।

कार्यक्रमअनुसार एक जना छोरीको बीमा गर्दा ३७ हजार चार सय ५७ रुपैयाँ ३७ पैसा प्रिमियम तिर्नुपर्ने हुन्छ । यस कार्यक्रमको उद्देश्य छोरीको शिक्षामा निरन्तरता सुनिश्चित गर्नु र बालिकाका लागि आर्थिक सुरक्षाको व्यवस्था गर्नु हो ।

यसैबीच, स्थानीय बासिन्दा र अभिभावकहरूले पनि योजनाको पुनः सञ्चालनको माग गर्दै मधेश प्रदेश सरकारसँग छोरी शिक्षा बीमा कार्यक्रमलाई प्राथमिकतामा राख्न आग्रह गरेका छन् ।