जनकपुरधाम, २९ साउन । मधेश प्रदेशका मुख्यमन्त्री सतिश कुमार सिंहले स्वास्थ्य क्षेत्रमा देखिएका विकृतिहरू अन्त्य गर्न सरोकारवाला सबै पक्षको सक्रिय सहयोग आवश्यक रहेको बताएका छन् ।

बिहीबार जनकपुरधाममा सञ्चालनमा आएको आरोग्य निकेतन अस्पतालको उद्घाटन गर्दै उनले स्वास्थ्य क्षेत्र सुधारका लागि निगरानी र समुचित व्यवस्थापन अपरिहार्य भएको बताएका हुन् ।

मुख्यमन्त्री सिंहले विगतमा सञ्चालित अस्पताल अनुगमनको क्रममा मधेश प्रदेशका केही अस्पतालमा विभिन्न खालका विकृतिहरू देखिएको उल्लेख गर्दै त्यस्ता कार्यहरू रोक्न र नियन्त्रण गर्न सबै पक्षको निगरानी जरुरी रहेको बताए । उनले अस्पताल खोल्ने क्रम बढे पनि व्यवस्थापकीय कमजोरीका कारण कतिपय अस्पताल आफैँ ‘बिरामी’ अवस्थामा रहेको र यसलाई सुधार गर्न आवश्यक रहेको बताए ।

उनले एम्बुलेन्सका ड्राइभरहरूले अस्पताल खोलेर दिनदहाडै नागरिकलाई लुट्ने कार्य गरेकोले त्यस्तो कार्यमा संलग्न व्यक्तिहरूलाई कडाइका साथ कारबाही गरिने उल्लेख गरे । यसैगरी, गरिब र विपन्नका लागि छुट्याइएको १० प्रतिशत शय्याको सुविधा वास्तवमा त्यस वर्गकै व्यक्तिले लिनु पर्नेमा विशेष ध्यान दिनुपर्नेमा उनले जोड दिए ।

आरोग्य निकेतन अस्पतालले मुटु रोगसम्बन्धी सेवा प्रदान गर्ने भएकाले स्थानीय नागरिकहरूलाई उपचार सुविधा सहज पहुँचमा हुने मुख्यमन्त्री सिंहले जानकारी दिए । उनले अस्पतालले समयानुकूल प्रविधि प्रयोग गरी सेवा प्रदान गर्नुपर्नेमा पनि जोड दिए ।

कार्यक्रममा आरोग्य निकेतन अस्पतालका अध्यक्ष डा. गौराङ्ग मिश्राले अस्पतालले नागरिकलाई सन्तुष्ट हुने किसिमको सेवा प्रवाह गर्नेमा पूर्ण विश्वास व्यक्त गरे ।

कार्यक्रममा मधेश प्रदेशका पूर्व मुख्यमन्त्री लालबाबु राउत, वरिष्ठ चिकित्सक डा. विजयकुमार सिंह, डा. अमित सिंह, जनकपुरधाम उपमहानगरपालिकाका पूर्व नगर प्रमुख बृखेश चन्द्र लाल, बजरङ्ग साह, समाजसेवी असगर अली लगायतको उपस्थिति थियो ।