जनकपुरधाम, २५ साउन । जनकपुरधाम उपमहानगरपालिका–९ ब्रह्मपुरीस्थित थापा चोक नजिक आइतबार बिहान रेल र कार आपसमा ठोक्किएर दुर्घटना भएको छ ।

बागमती प्रदेश ०१–०२५च १२९० नम्बरको कार बिहान ८ः३० बजे महोत्तरीको पिपराढी स्टेशनबाट जनकपुरधामतर्फ आउँदै गरेको नेपाल रेल्वेको रेलसँग ठोक्किएको हो ।

जिल्ला प्रहरी कार्यालय धनुषाका प्रवक्ता प्रहरी नायव उपरिक्षक बरुणबहादुर सिंहका अनुसार दुर्घटना रेलमार्ग नजिकै रहेको ‘क्रसिङ एरिया’ मा भएको हो । प्रत्यक्षदर्शीहरूले बताए अनुसार रेलले कारलाई ठक्कर दिंदा ठूलो आवाज भएको थियो ।

कारमा सवार तीन जनालाई सामान्य चोटपटक लागेको छ भने कारमा ठूलो क्षति पुगेको छ । दुर्घटनापछि केही समयका लागि रेल सेवा अवरुद्ध भएको थियो ।