सर्लाही, २५ साउन । सर्लाही जिल्लाका दुई भिन्न स्थानमा भएका घटनामा दुई जनाको मृत्यु भएको छ भने एक जना गम्भीर घाइते भएका छन् ।

बरहथवा नगरपालिका–१६ मा लखन्देही खोलाले बगाउँदा ७० वर्षीय मोहम्मद जमिरको मृत्यु भएको हो । पिपरिया गाउँपालिका–१ का जमिर खेततर्फ जान खोलातर्फ तर्दा बेपत्ता भएका थिए । प्रहरी र स्थानीयहरूले खोजी गर्दा उनी बरहथवा–१९ र चक्रघट्टा गाउँपालिकाको सीमामा रहेको लखन्देही खोलाको किनारमा मृत फेला परेको इलाका प्रहरी कार्यालयका प्रहरी नायब उपरीक्षक निरञ्जन भट्टराईले जानकारी दिए ।

त्यसैगरी, हरिवन नगरपालिका–१० सुखेपोखरीमा मोटरसाइकलको ठक्करबाट साइकलमा सवार १४ वर्षीया दीपीका बुढाथोकीको मृत्यु भएको छ । प्रदेश ०२–०३–०१९ प ५४०८ नम्बरको मोटरसाइकलले बालिका सवार साइकललाई ठक्कर दिएको थियो । उक्त दुर्घटनामा मोटरसाइकल चालक पनि घाइते भएका छन् ।

प्रहरीले दुबै घटनाको विषयमा अनुसन्धान थालेको जनाएको छ ।