जनकपुरधाम, २२ साउन । सिंगापुरमा सम्पन्न Google for Education Champions Symposium मा जनकपुरधामस्थित मोनाष्टिक स्कूलका निर्देशक डा. सोनु कुमारले सहभागिता जनाउँदै नेपालको प्रतिनिधित्व गरेका छन् ।

कार्यक्रममा उनलाई ६ उत्कृष्ट च्याम्पियन्समध्ये एकको रुपमा Google Champions Talk मा बोल्ने अवसर दिइएको थियो ।

सोनुले ‘युवाअन्तरप्रेन्योरशिपमा सशक्तिकरण : हाम्रो राष्ट्रिय नवप्रवर्तन सम्मेलनमा कसरी गुगल समाहित भयो’ भन्ने शीर्षकमा प्रस्तुति दिएका थिए । उनले युवाहरुले कसरी गुगल टुल्सको प्रयोग गरी आफ्ना विचारलाई व्यवहारमा उतारिरहेका छन् भन्ने विषयमा अनुभव साझा गरेका थिए ।

‘गुगल टुल्सको साथमा हाम्रो राष्ट्रिय नवप्रवर्तन सम्मेलनमा सहभागी युवा उद्यमीहरुले आफ्ना आइडियालाई कर्ममा परिणत गरेका छन्,’ भन्दै सोनुले प्रस्तुतिमा नेपालमा प्रविधिमार्फत उद्यमशीलतालाई कसरी प्रवर्द्धन गरिरहेको छ भन्ने विषयमा प्रकाश पारे ।

सोनुसहित अन्य ५ अन्तर्राष्ट्रिय वक्ताहरुले पनि विविध शैक्षिक नवप्रवर्तनमूलक विषयमा आफ्ना अनुभवहरु प्रस्तुत गरेका थिए । ती वक्ताहरुमा फिलिपिन्सका Joseph Gabriel Educado ले Gemini को प्रयोगबाट नवीनतम विचारको खोज, भियतनामका Bung Tran ले दृष्टिविहीन विद्यार्थीका लागि Gemini मार्फत सिकाइलाई सजिलो बनाउने, दक्षिण कोरियाका Hyojin Jun ले Gemini को Canvas फिचरद्वारा युनिभर्सल डिजाइन फर लर्निङ प्रवर्द्धन, मलेसियाका Shamsuria Ebni ले शतप्रतिशत गुगल प्रमाणित विद्यालय निर्माण र जापानका Mayuko Koyama ले जापान र इन्डोनेसियाबीच शिक्षामार्फत JAPANESIA को माध्यमबाट सम्बन्ध विस्तारबारे प्रस्तुती दिएका थिए ।

कार्यक्रममा सहभागी भएर नेपालको प्रतिनिधित्व गर्न पाएकोमा गर्व र सम्मान महसुस भएको डा. सोनुले बताए । ‘गुगल जस्ता प्रविधि साझेदारको सहयोगले युवाहरुको क्षमतामा अभूतपूर्व परिवर्तन सम्भव भएको छ,’ उनले भने ।

कार्यक्रमबाट अन्तर्राष्ट्रिय समुदायसँग अन्तरक्रिया गर्ने अवसर पाएकोमा आफू प्रेरित भएको र आगामी दिनमा अझ प्रभावकारी योगदान दिन उत्साहित भएको डा. सोनुले बताए ।