जनकपुरधाम, २० साउन । राजर्षिजनक विश्वविद्यालयले केन्द्रीय परीक्षा सञ्चालन तथा अभिलेख केन्द्रको परीक्षा नियन्त्रक पदमा प्रा.डा. श्यामकिशोर महतोलाई नियुक्त गरेको छ ।

विश्वविद्यालयको कार्यकारी परिषद्को निर्णयअनुसार उनलाई चार वर्षका लागि परीक्षा नियन्त्रक पदमा नियुक्त गरिएको हो ।

विश्वविद्यालयका रजिष्ट्रार सत्यनारायण साहद्वारा जारी नियुक्ति पत्रमा महतोले विश्वविद्यालयको ऐन तथा नियमावली, २०७५ बमोजिम कार्य सम्पादन गर्ने उल्लेख गरिएको छ ।

पदभार ग्रहण गर्दै परीक्षा नियन्त्रक प्रा.डा. महतोले राजर्षिजनक विश्वविद्यालयअन्तर्गत सञ्चालन हुने सबै परीक्षा मर्यादित, पारदर्शी र समयमै सम्पन्न गराउने प्रतिबद्धता जनाए । ‘परीक्षा तालिका अनुरूप परीक्षा सञ्चालन गरिनेछ,’ उनले भने, ‘परीक्षा प्रणालीलाई अझ व्यवस्थित र भरपर्दो बनाउने मेरो प्राथमिकता हुनेछ ।’

धनुषा जिल्लाको सबैला नगरपालिका–३ निवासी महतोले पटना विश्वविद्यालयबाट तथ्याङ्कशास्त्रमा विद्यावारिधि गरेका छन् । शिक्षा क्षेत्रमै झन्डै तीन दशक बिताएका उनले विगत २८ वर्षदेखि विभिन्न शैक्षिक संस्थामा अध्यापन गराउँदै आएका छन् ।