सर्लाही, १२ साउन । सर्लाहीको ब्रह्मपुरी गाउँपालिका–७ मोहनगंजस्थित भित्री सडकखण्डमा सोमबार बेलुकी एक सवारी दुर्घटनामा पाँच वर्षीया बालिकाको ज्यान गएको छ । टेमुको एकेडेमी स्कुलको बसले घर फर्काउने क्रममा विद्यार्थीमाथि च्यापिंदा ज्यान गएको हो ।

दुर्घटनामा परेकी बालिका आशिका महतो ईश्वरपुर नगरपालिका–१ चौलिखास्थित टेमुको एकेडेमी स्कुलकी कक्षा एकमा अध्ययनरत छात्रा थिइन् । स्थानीय रमेश महतोकी छोरी आशिका स्कुल बसबाट झर्दै गर्दा पछाडिको चक्कामा परेर गम्भीर घाइते भएकी थिइन् । उनलाई तुरुन्तै जीवन नारायण अस्पताल बयलबास पुर्याइए पनि साँझ ४ः४० बजे चिकित्सकले मृत घोषणा गरेका थिए ।

दुर्घटनामा प्रयोग भएको म.प्र. ०३–००१ क २५४२ नम्बरको बस अहिले प्रहरीको नियन्त्रणमा रहे पनि बस चालक भने घटना लगत्तै फरार भएको जिल्ला प्रहरी कार्यालय सर्लाहीले जनाएको छ । फरार चालकको खोजी कार्य जारी रहेको प्रहरीले जनाएको छ ।

घटनास्थलमा प्रहरी निरीक्षक महेन्द्र चौधरीको नेतृत्वमा इलाका प्रहरी पोष्ट नोकेल्वाबाट ४ जना, प्रहरी नायब निरीक्षक प्रमोद कुशवाहाको नेतृत्वमा इलाका प्रहरी कार्यालय भक्तीपुरबाट थप ४ जना, र प्रहरी निरीक्षक रविन्द्र कार्कीको कमाण्डमा जिल्ला प्रहरी कार्यालय सर्लाहीबाट १३ जना प्रहरी परिचालित भएका थिए ।

मृतक बालिकाको शव अहिले पोष्टमार्टमका लागि मलगवा अस्पतालमा राखिएको छ ।