सप्तरी, ११ साउन । सप्तरीको सदरमुकाम राजविराजस्थित मधेश कृषि विश्वविद्यालयमा अध्ययनरत विद्यार्थीहरूले शैक्षिक अव्यवस्था, शुल्क अनियमितता र भौतिक पूर्वाधारको अभावप्रति आक्रोश व्यक्त गर्दै आइतबार शैक्षिक भवनमा तालाबन्दी गरेका छन् ।

विद्यार्थीहरूले कक्षा कोठाहरूमा शैक्षिक वातावरण अनुकूल बनाउने, विद्यार्थी अनुपातअनुसार बेन्च–डेस्कको व्यवस्था मिलाउने, पूर्वनिर्धारित भन्दा बढी शुल्क लिने कार्य तत्काल बन्द गर्ने, बढी लिइएको शुल्क फिर्ता गर्ने, शुल्क बुझाउँदा नगद रसिद उपलब्ध गराउने र प्रयोगात्मक कक्षा नियमित सञ्चालन गर्नेजस्ता मागहरू अघि सारेका छन् ।

आन्दोलनरत विद्यार्थीहरूका अनुसार पटक–पटक लिखित तथा मौखिक रूपमा क्याम्पस प्रशासनलाई जानकारी दिँदासमेत कुनै सुनुवाइ नभएपछि तालाबन्दी गर्न बाध्य भएका हुन् । उनीहरूले माग सम्बोधन नभएसम्म तालाबन्दी नखोल्ने अडान समेत लिएका छन् ।

विद्यार्थीहरूका अनुसार विश्वविद्यालयले पहिले ३ लाख २० हजार रुपैयाँ शुल्क लाग्ने जानकारी गराएको भए पनि अहिले ४ लाख ५० हजार रुपैयाँसम्म असुल गरिएको छ । त्यसबापतको रसिदसमेत अहिलेसम्म नदिइएको र साथै प्रयोगात्मक कक्षाहरू नियमित नहुँदा पढाइमा प्रत्यक्ष असर परेको गुनासो गरेका छन् ।

श्रोत–साधनको अभावका कारण केही समस्या देखिएको स्वीकार गर्दै विश्वविद्यालय प्रशासनले शुल्क सम्बन्धी गल्ती प्राविधिक कारणले भएको बताएको छ । साथै, समस्या समाधानका लागि प्रयास जारी रहेको प्रतिक्रिया पनि दिएको छ ।

तर, आन्दोलनरत विद्यार्थीहरू विश्वविद्यालय प्रशासनको यस्तो भनाइलाई समय टार्ने बहाना भन्दै असन्तुष्टि जनाइरहेका छन् । उनीहरू अब विश्वविद्यालयले तुरुन्तै ठोस कदम चालेर समस्या समाधान नगरे आन्दोलन थप चर्किने चेतावनी दिइरहेका छन् ।