जनकपुरधाम, १० साउन । नेपाल डेन्टल एशोसिएसन धनुषा शाखाको अध्यक्षमा डा. राजिव शर्मा निर्वाचित भएका छन् । शनिबार सम्पन्न निर्वाचनमा उनले आफ्ना निकटतम प्रतिस्पर्धी डा. रामसरोज साहलाई ४५ मतले पछि पार्दै विजयी हासिल गरेका हुन् ।

यसपटक नयाँ कार्यसमितिका लागि सम्पन्न निर्वाचनमा कुल ८८ सदस्यमध्ये ७१ जनाले आफ्नो मताधिकार प्रयोग गरेका थिए । निर्वाचन समितिका अनुसार अध्यक्ष पदमा डा. शर्माले बहुमत मत प्राप्त गरेका हुन् ।

निर्वाचनमा उपाध्यक्ष पदमा डा. राम पदारथ यादव विजयी भएका छन् भने महासचिवमा डा. सुमन कर्ण निर्विरोध निर्वाचित भएका छन् । कोषाध्यक्ष पदमा डा. मिशा महासेठ र सह–सचिव पदमा डा. अम्बिका यादव निर्वाचित भएकी छन् ।

सदस्य पदमा डा. मिनु यादव, डा. प्रदिप के. यादव, डा. अञ्जली कुमारी गामी र डा. निक्की कुमारी यादव निर्विरोध निर्वाचित भएको निर्वाचन अधिकृत डा. अशोक कुमार सिंहले जानकारी दिए ।

नयाँ नेतृत्वले डेन्टल चिकित्सकहरूको हकहित र सेवा प्रवाहलाई अझ प्रभावकारी बनाउने प्रतिबद्धता जनाएका छन् ।