जनकपुरधाम, ९ साउन । धनुषाको शहीदनगर नगरपालिका–३ यदुकुहामा सञ्चालनमा रहेको ‘जय माता दी डेन्टल हेल्थ केयर प्रा.लि.’ अवैध रहेको खुलेको छ ।

नेपाल मेडिकल काउन्सिलमा परेको उजुरीका आधारमा गरिएको अनुगमनका क्रममा सो क्लिनिक नेपाल मेडिकल काउन्सिलमा दर्ता नै नगरि स्थानीय तहबाट समेत अनुमति नलिएको पाइएको छ ।

अनुगमनका क्रममा सञ्चालक शम्भु कुमार भास्करले आफ्नी पत्नी अम्बिका कुमारी यादवको नाममा कम्पनी रजिष्ट्रार कार्यालयमा मात्र दर्ता गरी क्लिनिक सञ्चालन गरिरहेको पाइएको हो । उनले पान नम्बर लिई दन्त उपचार सेवा दिन थालेको र दैनिक दर्जनौं बिरामीको उपचार आफैं गरिरहेको देखिएको छ ।

स्थानीयले दिएको जानकारीअनुसार भास्करले आफू ‘सिएमए’ भएको दाबी गर्दै दन्त विशेषज्ञको जस्तो व्यवहार देखाउँदै आएका छन् । उनले हड्डी भाँचिएको उपचारसमेत गरेको भिडियो सार्वजनिक भएपछि नेपाल मेडिकल काउन्सिल र नेपाल डेन्टर एशोसिएशनको टोलीले अनुगमन गरेको थियो ।

डा. अजय साह, डा. सुमन कर्णलगायतको टोलीले गरेको स्थलगत निरीक्षणमा सो क्लिनिक पूर्ण रूपमा अवैध पाइयो । बोर्डमा उल्लेख गरिएको दन्त विशेषज्ञ डा. कपिलदेब यादव र डा. विनिता अधिकारीको नाम देखिए पनि दुवै चिकित्सकले त्यहाँ कहिल्यै काम नगरेको पुष्टि भएको छ । डा. यादव जनकपुरधाममा निजी क्लिनिक सञ्चालन गरिरहेका छन् भने डा. अधिकारी दुई वर्षदेखि काठमाडौँमा कार्यरत रहेको खुलेको छ ।

अनुगमनका क्रममा सुर्यनाथ राण स्मृति अस्पताल डुमरियामा कार्यरत डा. रामकेवल साह एक जना महिलाको उपचार गरिरहेका थिए । उनले सो क्लिनिकमा हप्तामा तीन दिन मात्र सेवा दिँदै आएको बताए ।

स्थानिय मालती रजकले आफू उपचारका लागि आएको तर बोर्डमा उल्लेखित डाक्टरको उपस्थिति नदेखिएको गुनासो गरिन् । ‘हामी त नाम हेरौंला भन्या पनि छैनौं, सीधै उपचार गराउँछौं,’ उनले भनिन्, ‘पछि मात्रै थाहा भयो, यहाँ त डाक्टर नै छैनन् ।’

नेपाल मेडिकल काउन्सिलका सदस्य डा. अजय साहले सञ्चालक भास्करलाई काजगात प्रस्तुत गर्न भनिए पनि उनले कुनै प्रमाण नदेखाएको बताए । उनले भास्करलाई काउन्सिलमा उपस्थित हुन निर्देशन दिइएको जानकारी दिए ।

शहीदनगर नगरपालिका र स्थानीय प्रशासन यसबारे बेखबर रहेको देखिन्छ । काउन्सिलमा परेको उजुरीपछि मात्रै वास्तविकता बाहिरिएको हो ।