जनकपुरधाम, ८ साउन । जनकपुरधामस्थित जनकपुर न्युरो अस्पताल पछिल्लो समय विवादमा तानिएको छ ।

उपचारका क्रममा गरिएको लापरवाही, अत्यधिक शुल्क असुली, चेक तथा तमसुकमा हस्ताक्षर गराउनेजस्ता आरोपहरूसहित तीन भिन्न जिल्लाका पीडित परिवारहरू आक्रोशित बनेका छन् । यिनले अस्पतालमाथि ‘उपचारको नाममा लुट’ गरेको आरोप लगाएका छन् ।

धनुषा, महोत्तरी र पर्साबाट आएका तीन जना बिरामीको उपचारपछि मृत्यु भएको घटनाले अस्पतालको व्यवहारप्रति गम्भीर प्रश्न उठाएको छ । ती परिवारहरू अहिले न्यायको खोजीमा छन् भने जनताबीच अस्पतालमाथि भरोसा कमजोर हुँदै गएको छ ।

धनुषाको हंसपुर नगरपालिका–६ का शम्भु साहका १६ वर्षीय छोरा आयुष साह गत माघ १९ गते मोटरसाइकल दुर्घटनामा परेपछि जनकपुर न्युरो अस्पतालमा भर्ना गरिएका थिए । दुई महिना उपचार गरे पनि अवस्था ठिक नहुँदा उनलाई काठमाडौंको ट्रमा सेन्टरमा रेफर गरियो । साउन २ गते त्यहीँ मृत्यु भयो ।

शम्भु साहको आरोप अनुसार अस्पतालले आठ लाखभन्दा बढी रकम असुली गरेपछि मात्र रेफर गरियो । त्यो पनि चेक र तमसुकमा हस्ताक्षर गराएर । ‘ब्रेन खोलेर गल्ती गरियो,’ उनी भन्छन्, ‘ट्रमाका डाक्टरले नै केस बिग्रिसकेको बताए ।’

उनको चित्कारसहितको भिडियो छोराको शवसहित सार्वजनिक भएपछि सामाजिक सञ्जालमा भाइरल बन्यो । यो भिडियोले लाखौंको मन हल्लाएको छ ।

धनुषाकै शहीदनगर नगरपालिका–५ निवासी चन्देश्वर कापरले आफ्नो २२ वर्षीय छोरा जीवन कापरको उपचारमा आठ लाख रुपैयाँ खर्च गरे । तीमध्ये अधिकांश पैसा चार कठ्ठा जग्गा बेचेर जुटाइएको थियो ।

‘डाक्टरहरूले छोरालाई बारम्बार बेहोस बनाउँदै पैसा असुल्ने काम गरे,’ उनले भने, ‘अन्त्यमा न पैसा बाँकी रह्यो, न छोरा ।’ उनका अनुसार अस्पतालले गाउँमा चन्दा उठाएर ल्याइएको रकम समेत लिएको थियो ।

महोत्तरीको औरही गाउँपालिका–४ निवासी संगीता कुमारी रामको श्रीमान् रञ्जित कुमार रामको एक महिनासम्म जनकपुर न्युरो अस्पतालमा उपचार चल्यो । उनी भन्छिन्, ‘पहिला श्रीमान् ठीक हुँदै थिए, भिडियो कलमा बोल्थे, हिँड्न थालेका थिए । तर, अस्पतालले ‘बदमासी गरे’ भनेर बेहोस बनाउने सुई दियो ।’

उनले १५ लाख ९० हजार रुपैयाँ तिरेको दाबी गरेकी छन् । काठमाडौंका चिकित्सकले समेत जनकपुरमै उपचारमा त्रुटि भएको बताएको संगीताको भनाइ छ ।

यी सबै घटनापछि आलोचना बढेपछि जनकपुर न्युरो अस्पतालले पत्रकार सम्मेलनमार्फत सबै आरोप अस्वीकार गरेको छ । न्युरो सर्जन डा. विजय राउतले अमेरिकाजस्तै अत्याधुनिक टिम र मेसिन प्रयोग गरेर उपचार गरिरहेको भन्दै आफूहरूमाथि लगाइएका आरोप झुटा र भ्रामक भएको बताए ।

उनका अनुसार आयुषको मृत्यु काठमाडौंमा भएको हो र न्युरो अस्पतालले मात्र तीन लाख नगद र पाँच लाखको चेक लिएको हो । चेक र तमसुकमा हस्ताक्षर गराइएको आरोप पनि अस्पतालले अस्वीकार गरेको छ । तर, पीडित पक्षहरूको आँसु र प्रमाणहरू मिडियामा खुलेर आएका छन् । यसले अस्पतालको बचाउमा प्रश्न उठाएको छ ।

निजी अस्पतालको नियमन, मूल्य नियन्त्रण, सेवाको गुणस्तर र बिरामीको अधिकार सम्बन्धी विषयमा मधेश प्रदेश सरकारले अहिलेसम्म कुनै प्रतिक्रिया दिएको छैन । पीडित परिवारले निष्पक्ष छानबिन र दोषी भए कानुनी कारबाहीको माग गर्दै प्रदेश तथा संघीय सरकारसँग न्यायको गुहार गरेका छन् ।

अहिलेसम्म तीनवटा घटना मात्रै सार्वजनिक भएका छन् । तर, स्थानीय भन्छन्, ‘यस्ता धेरै घटना छन् जुन ‘डर’, ‘धम्की’ वा ‘सहमति’मा थमाइएका छन् ।’