सर्लाही, ८ साउन । सर्लाही सदरमुकाम मलंगवास्थित प्रादेशिक अस्पतालमा चार दिनपछि सेवा पुनः सुचारु भएको छ ।

सोमबार एक बिरामीका आफन्तबाट चिकित्सकमाथि हातपात भएपछि आन्दोलित बनेका स्वास्थ्यकर्मी बिहीबारदेखि पुनः नियमित सेवामा फर्किएका हुन् ।

अस्पतालका अर्थोपेडिक डा. कृष्णजंग साहमाथि सोमबार सवारी दुर्घटनामा परेका घाइतेको उपचारका क्रममा बिरामीका आफन्तले दुर्व्यवहार गर्दै हातपात गरेका थिए । घटनापछि आक्रोशित चिकित्सक र स्वास्थ्यकर्मीहरूले दोषीमाथि कारबाहीको माग गर्दै मंगलबारदेखि आकस्मिकबाहेक सम्पूर्ण सेवा ठप्प पारेका थिए ।

घटनालगत्तै जिल्ला प्रहरी कार्यालय सर्लाहीमा बसेको छलफलमा दोषी पक्षले गल्ती स्वीकार गर्दै माफी मागेपछि चिकित्सा टोलीले आन्दोलन फिर्ता लिएको हो । अस्पतालका सूचना अधिकारी डा. अविनाश सिंहका अनुसार सहमति अनुसार बिहीबारदेखि नियमित सेवा पुनः सुरु गरिएको छ ।

स्वास्थ्यकर्मीमाथिको सुरक्षा सुनिश्चित गर्नुपर्ने मागसहित सुरु भएको यो आन्दोलन दोषीको स्वीकारोक्ति र सहमतिपछि टुंगिएको हो । अस्पताल प्रशासनले यस्ता घटना पुनः दोहोरिन नदिन आवश्यक सुरक्षात्मक उपायहरूमा जोड दिने जनाएको छ ।