जनकपुरधाम, ७ साउन । मधेश प्रदेश सरकारले निजी स्वास्थ्य क्षेत्रमा सुधार गर्ने उद्देश्यले सुरु गरेको ‘अप्रेसन अस्पताल’ अभियान प्रभावहीन बन्दै गएको छ ।

अवैध अस्पतालहरू बन्द गराउने लक्ष्यसहित सात महिनाअघि व्यापक रूपमा थालिएको अभियान अहिले औपचारिकताको घेरामा सीमित हुन थालेको देखिन्छ ।

मुख्यमन्त्री सतिश कुमार सिंहको नेतृत्वमा रहेको जनमत पार्टी सरकारको प्राथमिकता परियोजनामध्ये एक मानिएको यो अभियान प्रारम्भमा प्रभावशाली रूपमा अघि बढेको थियो । पर्सा, बारा, सर्लाही, धनुषा, सिरहा र सप्तरीलगायतका जिल्लामा दर्जनौँ नपुगेका अस्पतालहरूमा छापा मार्दै तालाबन्दी गरिएको थियो । तर, निरन्तरता र निगरानीको अभावमा तीमध्ये धेरै अस्पतालहरू पुनः सञ्चालनमा आएका छन् ।

प्रदेश स्वास्थ्य मन्त्रालयका अनुगमन टोली सदस्य सन्तोष ठाकुरका अनुसार केही अस्पतालहरू स्थानीय तहकै मिलेमतोमा फेरि खुलेका छन् । ठाकुर भन्छन्, ‘केही स्थानीय सरकारहरूले अधिकारको हवाला दिँदै अनियमित अस्पतालहरूलाई संरक्षण गरिरहेका छन् ।’

सर्लाहीको मिथिला डेन्टल क्लिनिक, मलंगवाको देव श्री पोलिक्लिनिक, वीरगंजको नेपाल इन्डो हस्पिटल एण्ड आइ केयर सेन्टर जस्ता अस्पतालहरू मापदण्ड नपुगेको भन्दै बन्द गरिए पनि अहिले बिना अनुमति पुनः सञ्चालनमा आएको आरोप लागेको छ ।

कलैया, लालबन्दी, मिर्चैया लगायतका ठाउँमा पनि यस्तै अभ्यास दोहोरिइरहेको देखिएको छ । यस्ता घटनाले स्वास्थ्य सुधार अभियानको दीर्घकालीन प्रभावकारिता र प्रदेश सरकारको प्रतिबद्धता माथि प्रश्न उठाएको छ ।

स्वास्थ्य सेवा सुधारका लागि गरिएको भनिएको यो अभियान अब निष्कर्षविहीन बन्ने खतरा देखिन थालेको छ । नागरिकस्तरमा पनि प्रदेश सरकारको नियत र योजना कार्यान्वयनप्रति संकटपूर्ण विश्वास देखा परेको छ ।