महोत्तरी, १ साउन । बर्दिवास नगरपालिकाभित्र स्थायी रूपमा बसोबास गर्ने दीर्घरोगीलाई औषधि उपचार खर्चका लागि विवरण नविकरण अनिवार्य गरिएको छ ।

मृगौला प्रत्यारोपण गराएका, नियमित डायलाइसिस गराइरहेका, क्यान्सर पीडित तथा मेरुदण्ड पक्षघात भएका दीर्घरोगी बिरामीहरूले औषधि उपचार खर्च वापत पाउँदै आएको सुविधा निरन्तर पाउनका लागि आफ्नो विवरण नविकरण गर्नुपर्ने भएको छ ।

नगरपालिकाले सार्वजनिक सूचना जारी गर्दै आर्थिक वर्ष २०८१/८२ मा पनि नेपाल सरकारको नीतिअनुसार मासिक ५ हजार बराबरको औषधि उपचार खर्च उपलब्ध गराइने जानकारी गराएको छ । नगर प्रमुख प्रशासकीय अधिकृत राममणि अधिकारीद्वारा हस्ताक्षरित सूचनामा उल्लेख भएअनुसार भदौ महिनाको अन्त्यसम्म विवरण नविकरण गर्न नसकेमा सुविधा रोकिनेछ ।

सुविधा निरन्तरता चाहने लाभग्राहीहरूले उपचाररत अस्पतालबाट जारी गरिएको प्रमाणित पत्र, बिरामीको नागरिकता प्रमाणपत्र वा जन्मदर्ता प्रमाणपत्रको प्रतिलिपि, राष्ट्रिय वाणिज्य बैंकमा रहेको बिरामीको खाताको चेकको प्रतिलिपि, सम्बन्धित वडा कार्यालयको सिफारिस पत्रलगायतका कागजातहरू अनिवार्य रूपमा बुझाउनु पर्नेछ ।

नगरपालिकाले वडा नं. १ देखि १४ सम्मका सबै वडाहरुलाई सूचनालाई लाभग्राहीसम्म पुर्याउन निर्देशनसमेत दिएको छ ।