जनकपुरधाम, ३२ असार । नेकपा माओवादी केन्द्रका मधेश प्रदेश इञ्चार्ज तथा पूर्वमन्त्री मातृका प्रसाद यादवले जनकपुरधाम–१४ रजौलस्थित रामजानकी बहुउद्देशीय अन्तर्राष्ट्रिय रंगशालाको निरीक्षण गर्दै खेलकुदप्रति प्रतिबद्धता व्यक्त गरेका छन् ।

निरीक्षणको अवसरमा उनले किशोरहरूलाई लक्षित गर्दै ३ सेट क्रिकेट किट हस्तान्तरण गरेका हुन् ।

खेलकुदको विकास र युवाहरूलाई सकारात्मक दिशातर्फ उन्मुख गराउन राज्यको भूमिका आवश्यक रहेको उल्लेख गर्दै यादवले स्थानीय खेलमैदानको समुचित उपयोग र पूर्वाधार विस्तारमा निरन्तर सहयोग रहने प्रतिबद्धता जनाए ।

जिल्ला क्रिकेट संघ धनुषाका अध्यक्ष शोभाकान्त पाण्डेयले मातृका यादवप्रति आभार प्रकट गर्दै भने, ‘समाज निर्माणको जग नै अनुशासित र सभ्य युवाशक्ति हो । यसका लागि खेलकुद क्षेत्रमा लगानी आवश्यक छ ।’ उनका अनुसार यस किसिमको सहयोगले खेलाडीको मनोबल बढाउनुका साथै भविष्यका सम्भावित प्रतिभाहरूलाई पनि प्रोत्साहन गर्छ ।