महोत्तरी, ३१ असार । गौशाला नगरपालिकाभित्रका सामुदायिक विद्यालयमा देखिएको बजेट अभावका कारण विद्यालय सञ्चालनमा समस्या उत्पन्न भएपछि ३२ वटै विद्यालयका प्रधानाध्यापकले मंगलबार सामूहिक रूपमा राजीनामा दिएका छन् ।

नगरपालिकाको प्रशासन शाखामा लिखित रूपमा राजीनामा बुझाउँदै प्रधानाध्यापकहरूले नगर कार्यपालिकाले अत्यावश्यक शैक्षिक तथा सञ्चालन खर्चको रकम निकासा नगरेको भन्दै आक्रोश व्यक्त गरेका छन् ।

प्रधानाध्यापकहरूको भनाइअनुसार दिवा खाजा, पाठ्यपुस्तक, नन–सैलरी, नगर शिक्षक तथा अनुदान शिक्षकको तलब, सशर्त पुँजीगत तथा शैक्षिक अनुदान शीर्षकका बजेट निकासामा समेत आलटाल गरिएको छ ।

‘वर्षको अन्त्यसम्म आइपुग्दा पनि बारम्बार ताकेता गर्दा कुनै सुनुवाइ नभएपछि हामी बाध्य भएर यो निर्णयमा पुगेका हौँ,’ एक प्रधानाध्यापकले भने ।

उनीहरूका अनुसार बजेट अभावले विद्यालयहरू दैनिक सञ्चालनमा समेत कठिनाइ भएपछि वैकल्पिक दबाबस्वरूप सामूहिक राजीनामा दिइएको हो ।

यस विषयमा गौशाला नगरपालिकाले औपचारिक प्रतिक्रिया भने दिएको छैन । शिक्षा क्षेत्रमा स्थानीय सरकारको भूमिकामाथि प्रश्न उठाउँदै अभिभावक र नागरिक समाजले तत्काल समस्या समाधान गर्न आग्रह गरेका छन् ।