सर्लाही, ३० असार । सर्लाहीको ईश्वरपुरमा मोटरसाइकल र पिकअप आपसमा ठोक्किँदा भएको सवारी दुर्घटनामा पाँच जना घाइते भएका छन् ।

सोमबार बिहान ईश्वरपुर नगरपालिका–१२ र १३ को सीमामा पर्ने श्रीनगर–बाँके सडक खण्डस्थित रेल्वे ट्रयाक नजिक दुर्घटना भएको हो ।

जिल्ला प्रहरी कार्यालय सर्लाहीका अनुसार श्रीनगरबाट बाँकेतर्फ जाँदै गरेको प्र.०३–०२८ प २१९१ नम्बरको मोटरसाइकल र महोत्तरीतर्फ गइरहेको बा.८ च ६५ नम्बरको पिकअप सवारी आपसमा ठोक्किँदा दुर्घटना भएको हो ।

दुर्घटनामा मोटरसाइकल चालक ईश्वरपुर–१५ का २३ वर्षीय चन्द्रदेव धामी, पछाडि सवार २२ वर्षीय प्रशेस चौधरी र २१ वर्षीय अमित चौधरी घाइते भएका छन् । त्यस्तै पिकअपका चालक हरिवन नगरपालिका–३ डाबरी टोलका ४० वर्षीय रामएकबाल महतो र सोही नगरपालिकाका २ नम्बर वडाका ६५ वर्षीय लेखनाथ उपाध्याय पनि घाइते भएका छन् ।

दुर्घटनापछि दुवै सवारी साधनमा आगलागी भएको प्रहरीले जनाएको छ । आगलागीबाट पिकअपको अगाडिको भाग र मोटरसाइकल पूर्ण रूपमा जलेर नष्ट भएको हो ।

घाइतेहरूलाई उपचारका लागि लालबन्दीस्थित मोडेल अस्पतालमा पठाइएको छ । प्रारम्भिक अनुसन्धानका आधारमा तीव्र गतिका कारण दुर्घटना भएको प्रहरीको अनुमान छ ।