जनकपुरधाम, २९ असार । मधेश प्रदेशमा माध्यमिक शिक्षा परीक्षा (एसईई)मा अत्यधिक विद्यार्थी अनुत्तीर्ण भएकोप्रति विद्यार्थी जनमत संघले आपत्ति जनाउँदै शिक्षा, विज्ञान तथा प्रविधि मन्त्री रधुजी पन्तलाई ज्ञापनपत्र बुझाएको छ ।

जनमत पार्टीका केन्द्रीय उपाध्यक्ष अब्दुल खान, विद्यार्थी जनमत संघका केन्द्रीय संयोजक पोषण कुमार यादव, केन्द्रीय नेता नेहाल सिंह, नेता अतिउल्लाह मुसलमानलगायतको उपस्थितिमा शिक्षा मन्त्रालयमा पुगेर उक्त ज्ञापनपत्र बुझाइएको हो ।

२०८२ सालको परीक्षामा मधेश प्रदेशमा झण्डै ७१–७२ प्रतिशत विद्यार्थी अनुत्तीर्ण हुनु गम्भीर चिन्ताको विषय भएको भन्दै संघले यो विषयलाई राजनीतिक कोणबाट नभई शैक्षिक सुधारको दृष्टिले हेर्न आग्रह गरेको छ ।

विद्यार्थी जनमत संघका संयोजक यादवले भने, ‘विद्यार्थीको भविष्यसँग खेलवाड हुन दिनुहुन्न । परीक्षाफल मूल्याङ्कन प्रक्रियामा पारदर्शिता र समानता हुनुपर्छ । हामी परिणाम सुधार, सैद्धान्तिक स्पष्टता र विधिसम्मत कार्यान्वयनको माग राख्न आएका हौं ।’

ज्ञापनपत्रमार्फत संघले शिक्षा प्रणालीमा सुधार, उत्तरपुस्तिका पुनरावलोकनको व्यवस्था, परीक्षा प्रणालीको पारदर्शिता र विद्यार्थीमैत्री नीति निर्माणमा ध्यान दिन आग्रह गरेको छ ।

शिक्षा मन्त्री पन्तले संघको मागप्रति गम्भीरतापूर्वक छलफल गरी आवश्यक निर्णय लिइने प्रतिक्रिया दिएका छन् ।

मधेश प्रदेशमा विगत केही वर्षदेखि परीक्षाफल कमजोर हुँदै आएकोप्रति अभिभावक, विद्यार्थी तथा शिक्षकहरूबीच पनि असन्तुष्टि बढेको छ ।