जनकपुरधाम, २६ असार । नेपालका एक होनहार किशोर गणित प्रतिभा आशिष मिश्रले मुलुकको शैक्षिक इतिहासमा एक उल्लेखनीय कीर्तिमान राखेका छन् ।

धनुषा जिल्लाको औरही गाउँपालिका–२, परवाहाका १९ वर्षीय मिश्र अस्ट्रेलियाको क्विन्सल्याण्डस्थित सनसाइन कोस्टमा ६६औँ अन्तर्राष्ट्रिय गणित ओलम्पियाड प्रतिनिधित्व गर्न त्यसतर्फ प्रस्थान गरेका छन् ।

नेपाल गणित संघद्वारा सञ्चालित प्रतिस्पर्धात्मक छनोट प्रक्रियाबाट छनोट भएका मिश्रसहित नेपाली टोलीमा श्रेयश शर्मा बास्तोला (काठमाडौं), आयुष ठगुन्ना (दार्चुला), ड्रोन चौधरी (बारा), नमन महेश्वरी (मोरङ) र अयाम आचार्य (ललितपुर) रहेका छन् ।

आशिष हालै तुर्कमेनिस्तानको अश्गाबातमा सम्पन्न दोस्रो अन्तर्राष्ट्रिय गणित ओलम्पियाड (अप्रिल २१–२६) मा कांस्य पदक जित्दै अन्तर्राष्ट्रिय मञ्चमा पदक जित्ने पहिलो नेपाली विद्यार्थी बनेका थिए । यही ऐतिहासिक उपलब्धिका लागि मधेश प्रदेशका मुख्यमन्त्री सतिश कुमार सिंहले उनलाई विशेष सम्मान प्रदान गरेका थिए ।

मुख्यमन्त्री सिंहले भने, ‘तपाईंको सफलताले सम्पूर्ण मधेश प्रदेश मात्र नभई सिङ्गो देशको गौरव बढाएको छ । युवा पुस्ताका लागि तपाईं प्रेरणाको स्रोत बन्नुभएको छ ।’

तुर्कमेनिस्तानको प्रतियोगितामा ३० भन्दा बढी देशका ३०० विद्यार्थी सहभागी भएका थिए । नेपालबाट आयुष ढुङ्गाना (दार्चुला), आयुष मरासिनी (गुल्मी), सुहित ढुङ्गाना (भक्तपुर), प्रकाश आचार्य (काठमाडौं) र शुभम श्रेष्ठ (काठमाडौं) सहभागी थिए ।

उक्त टोलीको नेतृत्व गणित संघ नेपालकी सहकोषाध्यक्ष डा. सरस्वती आचार्यले गरेकी थिइन् भने धर्मेन्द्रकुमार यादवले प्राविधिक प्रशिक्षकको भूमिका निभाएका थिए ।

नेपालबाट अस्ट्रेलिया प्रस्थान गर्नुअघि काठमाडौँको दिव्य कलेज अडिटोरियम, तीनकुनेमा आयोजित विदाइ कार्यक्रममा गणित संघका महासचिव छवि ढुङ्गानाले मिश्रलाई अनुशासित, मिहिनेती र अत्यन्त प्रतिभाशाली विद्यार्थीको रूपमा प्रशंसा गर्दै उनको सफलताले सम्पूर्ण राष्ट्रलाई गौरवान्वित बनाएको बताए ।

अब मिश्रले विश्वभरका उत्कृष्ट ३०० गणितज्ञहरूसँग प्रतिस्पर्धा गर्दै नेपाललाई पुनः अन्तर्राष्ट्रिय गौरव दिलाउने लक्ष्यसहित प्रतिस्पर्धामा उत्रिएका छन् ।