जनकपुरधाम, २५ असार । शिक्षा तथा संस्कृति मन्त्रालय मधेश प्रदेशको आयोजना तथा समाज विकास केन्द्र महोत्तरीको सहजीकरणमा आयोजित प्रदेश अन्तर्गतका सरकारी तथा सामुदायिक कलेज÷क्याम्पस प्रमुखहरूको अन्तरक्रिया कार्यक्रम बुधबार जनकपुरधाममा सम्पन्न भएको छ ।

कार्यक्रममा नीति आयोगकी सदस्य शिला मिश्रा र प्रदेशसभा सांसद रुपा यादव विशेष अतिथिका रूपमा उपस्थित थिए । कार्यक्रममा कलेज तहको शिक्षामा देखिएका चुनौती, गुणस्तर सुधारका उपाय र संस्थागत समन्वयको खाँचोबारे छलफल भयो ।

ििमश्राले भनिन्, ‘शिक्षालाई सबल बनाउन शिक्षक मात्र नभई अभिभावकको समेत दायित्व हुन्छ । समस्या पहिचान गरेर गुणस्तर सुधारको अभियानमा लाग्नुपर्ने बेला हो । स्कूलदेखि नै सुधार आवश्यक छ ।’ उनले बजेट निर्माण प्रक्रियामा यस्ता अन्तरक्रिया उपयोगी हुने भन्दै क्याम्पसका समस्या तत्कालै बुझ्नुपर्ने आवश्यकता औंल्याइन् ।

प्रदेश सांसद रुपा यादवले मन्त्री वा सचिवको उपस्थिति विना आयोजना भएको कार्यक्रममा असन्तुष्टि जनाउँदै भनिन्, ‘शिक्षासम्बन्धी अन्तरक्रिया कार्यक्रममा मन्त्री र सचिव उपस्थित नहुनु अभिभावक बिनाको घरजस्तै हो ।’ उनले शिक्षाको गुणस्तर सुधारमा समितिको निगरानी अपरिहार्य रहेको बताउँदै दोषारोपणको प्रवृत्तिले समाधान नआउने स्पष्ट पारिन् ।

उनले भनिन्, ‘आज शिक्षा क्षेत्रमा डेस्क, ब्रेन्च र खाजाको सुविधा त छ । तर, शिक्षाको स्तर घट्दो छ । शिक्षकहरूले तलबको माग गर्छन् । तर, विद्यार्थीको परिणाम हेर्दा त्यो उचित छ कि छैन भन्ने पनि सोच्नुपर्छ ।’ यादवले अघिल्लो समय मधेश प्रदेशलाई साइन्स–म्याथ शिक्षाको उदाहरण मानिन्थ्यो भने अहिले त्यो अवस्था कमजोर भएको उल्लेख गरिन् ।

समाज विकास केन्द्रकी अध्यक्ष रिना कुमारी मण्डलले शिक्षा क्षेत्रमा सरकार, शिक्षक, अभिभावक र समुदायबीच मिलेर काम नगरी सुधार सम्भव नहुने बताउँदै सरकारलाई सहकार्यमा पनि अघि बढ्न आग्रह गरिन् ।

सहभागीहरूले शिक्षाको स्तर उकास्न प्रदेश सरकारलाई अझ सक्रिय र उत्तरदायी बन्न आग्रह गरे ।