जनकपुरधाम, २४ असार । नेपालकै सबैभन्दा बढी जनसंख्या भएको मधेश प्रदेश ‘पूर्ण खोप सुनिश्चितता तथा दिगोपना’ प्राप्त गर्ने पहिलो प्रदेश बनेको छ ।

मधेश प्रदेश सरकारको स्वास्थ्य तथा जनसङ्ख्या मन्त्रालयले जनकपुरधाममा मंगलबार आयोजना गरेको विशेष समारोहमार्फत औपचारिक घोषणा गरिएको हो ।

समारोहमा संघीय स्वास्थ्य तथा जनसङ्ख्या मन्त्रालयअन्तर्गत बाल स्वास्थ्य तथा खोप सेवा शाखाका प्रमुख डा. अभियान गौतमले प्रदेश सरकारलाई औपचारिक प्रमाणपत्र हस्तान्तरण गरे ।

कार्यक्रममा बोल्दै प्रदेशका स्वास्थ्य तथा जनसङ्ख्या मन्त्री शत्रुधन प्रसाद सिंहले मधेश प्रदेशको यो उपलब्धि सम्पूर्ण स्वास्थ्यकर्मीको समर्पण र मेहनतको परिणाम भएको उल्लेख गर्दै सबैलाई बधाई दिए ।

‘देशमै पहिलोपटक यस्तो महत्त्वपूर्ण लक्ष्य हासिल गर्नु गौरवको विषय हो,’ मन्त्री सिंहले भने, ‘अब यो निरन्तरतासँगै दिगो रूपमा कायम राख्नु हामी सबैको जिम्मेवारी हो ।’

प्रदेश स्वास्थ्य निर्देशनालयअन्तर्गत खोप शाखाका प्रमुख लक्ष्मेश्वर झाले अभियान अन्तर्गत २१३ जना एक डोज पनि नलिएका बालबालिकालाई पहिचान गरेर खोप दिइएको र अन्य १२ हजार २३० जना खोप छुटेकाहरूलाई घरमै पुगेर खोप लगाइएको जानकारी दिए ।

जिल्ला समन्वय समिति धनुषाका प्रमुख तथा जिल्ला खोप समन्वय समिति संयोजक राजनन्दन मण्डलले कार्यक्रमको सफल कार्यान्वयनले मधेश प्रदेशलाई राष्ट्रिय स्तरमा नमुना बनाएको बताए । उनले दीर्घकालीन योजना, अनुगमन र स्थानीय तहसँग सहकार्यलाई अझ प्रभावकारी बनाउनुपर्नेमा जोड दिए ।

कार्यक्रममा खोप अभियानमा विशिष्ट योगदान दिने स्वास्थ्यकर्मी, स्वयंसेवक तथा सरोकारवालाहरूलाई दोसल्ला ओढाई सम्मानपत्र प्रदान गरिएको थियो ।