सर्लाही, २२ असार । सर्लाही जिल्लाका सबै २० वटा स्थानीय तहहरूलाई आर्थिक वर्ष २०८१÷८२ को खोप सेवा मूल्याङ्कनका आधारमा ‘पूर्णखोप सुनिश्चित नगरपालिका तथा गाउँपालिका’ को रूपमा घोषणा गरिएको छ ।

स्वास्थ्य कार्यालय सर्लाहीको संयोजनमा मलंगवामा आयोजित एक विशेष समारोहमार्फत यो घोषणा गरिएको हो । कार्यक्रममा खोप अभियानमा उल्लेखनीय योगदान पुर्याउने पालिका प्रमुख, स्वास्थ्य शाखा प्रमुख तथा भ्याक्सिनेटरहरूलाई प्रमाणपत्र, प्रशंसापत्र, सम्मानपत्रसहित वाल घडी उपहार प्रदान गर्दै सम्मान गरिएको थियो ।

जिल्ला खोप समन्वय समिति सर्लाहीका सभापति तथा प्रमुख जिल्ला अधिकारी कौशल किशोर सिंहको अध्यक्षतामा सम्पन्न कार्यक्रममा इश्वरपुर नगरपालिकाका प्रमुख मनोज कुमार आचार्य, विष्णु गाउँपालिकाका अध्यक्ष जबाहरलाल यादव, हरिवन नगरपालिकाकी उपप्रमुख हरिमाया घलान, नेपाल रेडक्रस सोसाइटी सर्लाहीका सभापति नागेन्द्र प्रसाद चौधरी, युएनएफपीएका प्रतिनिधि बचा महतो, विश्व स्वास्थ्य संगठनका डा. राजीव शर्मा तथा मानव अधिकारकर्मी मुकेश मिश्र लगायत विशिष्ट व्यक्तिहरूको सहभागिता रहेको थियो ।

कार्यक्रममा स्वास्थ्य कार्यालय सर्लाहीका प्रमुख नवलकिशोर झाले जिल्लाका सबै पालिकामा लक्ष्यअनुसार खोप सेवा उपलब्ध गराई पूर्णखोप सुनिश्चितको मान्यता प्राप्त गरिएको जानकारी दिए । उनले खोप अभियानलाई सफल बनाउन समर्पित सम्पूर्ण स्वास्थ्यकर्मी, जनप्रतिनिधि तथा साझेदार संस्थाहरूलाई धन्यवाद दिँदै भविष्यमा अझ प्रभावकारी सेवा विस्तार गर्ने प्रतिबद्धता जनाए ।