जनकपुरधाम, २२ असार । मधेश प्रदेशको चर्चित मोनाष्टिक आवासीय माध्यमिक विद्यालय जनकपुरधामका उत्कृष्ट विद्यार्थीहरुलाई मधेश प्रदेशका सभामुख रामचन्द्र मण्डलले विशेष सम्मान गरेका छन् ।

शनिबार जनकपुरधाममा आयोजित एक समारोहमा एसईई २०८१ परीक्षामा ४.० जीपीए ल्याएका मोनाष्टिक स्कुलका ६ विद्यार्थीलाई सभामुख मण्डलले नगदसहित सम्मानपत्र प्रदान गरेका हुन् । सम्मानित विद्यार्थीहरूमा अविनाश यादव, अभिनव कर्ण, अमन महतो, धीरज पण्डित, प्रिन्स मोदी र प्रीयमराज साह रहेका छन् ।

कार्यक्रममा सभामुख मण्डलले जनकपुरधामको शैक्षिक स्तर सुधारका लागि गम्भीर प्रयास आवश्यक रहेको उल्लेख गर्दै मोनाष्टिक स्कुलको सफलतालाई ‘शिक्षामा प्रेरणादायक उपलब्धि’ रहेको बताए । उनले भने, ‘शिक्षा क्षेत्रको सुदृढीकरणमा यस्ता संस्थाहरुको भूमिका महत्वपूर्ण छ ।’

कार्यक्रममा जनता समाजवादी पार्टी नेपाल (जसपा)का मधेश प्रदेशका प्रमुख सचेतक रामअशिष यादवले पनि विद्यार्थीहरूलाई बधाई दिंदै मोनाष्टिक स्कुलमा मधेश प्रदेशमा मात्र नभई राष्ट्रिय स्तरमा पनि प्रतिस्पर्धा गर्न सक्ने क्षमता रहेको बताए । समारोहमा जनकपुरधाम उपमहानगरपालिकाका पूर्वमेयर लालकिशोर साह, स्कुलका निर्देशक डा. सोनुकुमार साह र प्रिन्सिपल शिखा नायकले विद्यार्थीहरूलाई नगद २५–२५ हजार रुपैयाँसहित संयुक्त रुपमा सम्मान गरेका थिए ।

स्कुलले एसईई २०८१ मा सतप्रतिशत नतिजा ल्याउँदै शिक्षा क्षेत्रमा आफ्नो विशिष्ट स्थान सुरक्षित गरेको छ । कार्यक्रममा अन्य उत्कृष्ट शिक्षक र विद्यार्थीहरूलाई पनि सम्मान गरियो ।

धनुषा जिल्लाबाट यस वर्षको माध्यमिक शिक्षा परीक्षा (एसईई) मा १६ जना विद्यार्थीले सर्वोत्कृष्ट ग्रेड ४.० जिपिए हासिल गर्न सफल भएका छन् । ती मध्ये सबैभन्दा धेरै विद्यार्थी मोनाष्टिक स्कूलका विद्यार्थी रहेका छन् । यस विद्यालयका ६ जना विद्यार्थीले ४ जिपिए ल्याएर विद्यालयको शैक्षिक गौरव बढाएका छन् ।

शिक्षा विकास तथा समन्वय इकाइ धनुषाको विवरणअनुसार मोनाष्टिक स्कूलका अभिनाश यादव, अभिनव कर्ण, अमन महतो, धिरज पण्डित, प्रियम राज साह र प्रिन्स मोदीले ४.० जीपीए ल्याएका हुन् ।

यस विद्यालयका ४ जना विद्यार्थीले ३.९६ जीपीए, ४ जना विद्यार्थीले ३.९५ जीपीएसहित जम्मा २४ जना विद्यार्थीले ३.९० भन्दा माथिको जीपीए प्राप्त गरेका छन् । त्यस्तै, ए प्लस १०३ जना, ए ६१ जना, बी प्लस २१ जना र बी ३ जनाले ल्याएका छन् ।

मोनाष्टिक स्कुल विगत केही वर्षदेखि जनकपुरधामको शैक्षिक उत्कृष्टताको केन्द्रको रूपमा स्थापित हुँदै आएको छ ।