महोत्तरी, २० असार । महोत्तरीको भंगहा नगरपालिकाको वडा नम्बर–८ स्थित श्रीनगर टोलमा रहेको एक विपन्न मुसहर बस्तीमा शिक्षा र सहयोगको आशा पलाएको छ । चारैतर्फ खोलाले घेरिएको टापुजस्तो देखिने यो दुर्गम बस्तीमा स्कुल नगएका बालबालिकालाई एक स्थानीय युवाले स्वेच्छिक ट्युसन कक्षा सञ्चालन गर्दै शिक्षाको उज्यालो फैलाउने काम गरिरहेका छन् ।

जनकपुरधामका बिकाउ राउतमार्फत जानकारी पाएपछि लायन्स क्लव अफ जनकपुरधाम, लायन्स क्लव अफ जनकपुरधाम गार्गी र लियो क्लव अफ जनकपुरधामको संयुक्त टोलीले उक्त बस्तीमा पुगेर शैक्षिक सामग्री र खाद्यान्न वितरण गरेका हुन् ।

कार्यक्रम अन्तर्गत स्कुल झोला, कपी, पेन्सिल, किताब तथा खाद्यान्न सामग्रीहरू वितरण गरियो । यस अभियानले शिक्षाबाट वञ्चित समुदायमा आशा र आत्मविश्वास भरिदिएको स्थानीयले बताएका छन् ।

दशकौंदेखि शिक्षा र आधारभूत सेवा सुविधाबाट टाढा रहेको यो मुसहर बस्तीमा, हाल महिला मात्रै रहेका परिवार बसोबास गर्छन् । युवायुवतीको अधिकांश हिस्सा रोजगारीको खोजीमा भारत गएका छन् ।

स्थानीय युवाको प्रयासमा सुरु भएको ट्युसन कक्षा र लायन्स क्लवहरूको सहयोगले यस बस्तीमा शिक्षा र मानवताको साझा अभियानको थालनी भएको छ । सहभागी संस्थाहरूले भविष्यमा पनि यस्ता समुदायमुखी कार्यक्रम निरन्तर गर्ने प्रतिबद्धता व्यक्त गरेका छन् ।